Թրամփը Մեքսիկային սպառնացել է նոր մաքսատուրքերով

ԱՄՆ-ի նախագահ Դոնալդ Թրամփը հայտարարել է, որ Մեքսիկայի նկատմամբ 5%-ի չափով մաքսատուրք կսահմանի՝ ջրի մատակարարման պայմանագիրը խախտելու պատճառով։ Այս մասին նախագահը գրել է՝ Truth Social-ում։

«Այս պահին Մեքսիկան չի արձագանքում (ԱՄՆ-ի հարցումներին-խմբ.), և սա շատ անարդար է ամերիկացի ֆերմերների նկատմամբ, ովքեր արժանի են այդքան անհրաժեշտ ջրին։ Ահա թե ինչու եմ ես պատրաստել փաստաթղթեր, որոնք թույլ են տալիս Մեքսիկայի նկատմամբ 5% մաքսատուրք սահմանել, եթե այդ ջուրն անհապաղ չմատակարարվի»,- գրել է Թրամփը։

Ինչպես The Washington Post-ը հայտնել է 2024 թվականի մայիսի 17-ին, Մեքսիկան տասնամյակներ շարունակ խախտել է պայմանագիրը՝ «դիմադրելով ԱՄՆ-ի ջրի մատակարարման իրականացմանը», քանի որ ինքը նույնպես տառապում է երաշտից։

Երկրները 1944 թվականին ստորագրել են պայմանագիր, որի համաձայն Մեքսիկան համաձայնել է յուրաքանչյուր հինգ տարին մեկ Ռիո Գրանդե գետի ավազանից ԱՄՆ ուղարկել մոտավորապես 2.2 միլիարդ խորանարդ մետր ջուր, մինչդեռ ԱՄՆ-ն համաձայնել է Կոլորադո գետից հակառակ ուղղությամբ ուղարկել 1.8 միլիարդ խորանարդ մետր ջուր։