ԱՄՆ-ն աջակցում է Իրաքին ԼՈՒԿՕՅԼ-ի ակտիվներն ամերիկյան ընկերությանը փոխանցելու հարցում

ԱՄՆ-ն աջակցում է Իրաքի ծրագրերին՝ ռուսական Lukoil ընկերության բաժնեմասը երկրի խոշորագույն նավթահանքերից մեկում՝ Արևմտյան Քուրնա-2-ում, ամերիկյան ընկերությանը փոխանցելու վերաբերյալ, հաղորդում է Bloomberg-ը՝ հղում անելով Պետդեպարտամենտի խոսնակին։

«Մեզ խրախուսում են Իրաքի նավթի նախարարության նախնական համաձայնագրերը Exxon-ի և Chevron-ի հետ, ինչպես նաև Արևմտյան Քուրնա-2-ը ամերիկյան օպերատորին փոխանցելու վերջին պարտավորությունը։ Միացյալ Նահանգները կշարունակի պաշտպանել ամերիկյան ընկերությունների շահերը Իրաքում»,- մեջբերում է գործակալությունը Պետդեպարտամենտի խոսնակի խոսքերը։

Իրաքի նավթի նախարարությունն անցյալ շաբաթ հայտարարել է ամերիկյան նավթային ընկերությունների հետ բանակցությունների մասին։ Նախարարությունը չի նշել, թե ով է մասնակցել բանակցություններին։ Reuters-ը հայտնել է, որ ամերիկյան ExxonMobil ընկերությունը հետաքրքրություն է հայտնել Lukoil-ի իրաքյան հանքավայրում վերահսկիչ բաժնեմասը ձեռք բերելու հարցում։