«Տարածքների հարցն ամենաբարդն է»․ Զելենսկի

Ուկրաինայի նախագահ Վլադիմիր Զելենսկին նշել է երկրի երեք հիմնական առաջնահերթությունները բանակցություններում, որոնք, իր խոսքով, ամենաբարդ հարցերն են․ տարածքներ, անվտանգության երաշխիքներ և երկրի պաշտպանության ու հետպատերազմյան վերականգնման համար անհրաժեշտ ֆինանսավորում։

«Անկեղծ ասեմ՝ տարածքային հարցն ամենաբարդն է։ Ֆինանսների և վերականգնման հարցը, իմ կարծիքով, եվրոպացի գործընկերների մասնակցության բացակայության դեպքում ընդունելը դժվար է, որովհետև փողը գտնվում է Եվրոպայում։ Ինձ թվում է՝ դա արդար չէ։ Եվ անվտանգության երաշխիքների հարցը, որտեղ ԱՄՆ-ից և Եվրոպայից ակնկալվում է հստակություն»,- նշել է Ուկրաինայի նախագահը։

«Կասեի, որ սրանք երեք հիմնական թեմաներն են, գլխավոր ուղղությունները, և միաժամանակ՝ երեք «տրիգերները»»,-հավելել է Զելենսկին։

Երեկ Զելենսկին Ֆրանսիա էր ժամանել, որտեղ հանդիպել է նախագահ Էմանուել Մակրոնի հետ, իսկ կիրակի օրը ուկրաինական պատվիրակությունը Ֆլորիդայում բանակցություններ է վարել ԱՄՆ պետքարտուղար Մարկո Ռուբիոյի, Դոնալդ Թրամփի հատուկ բանագնաց Սթիվ Ուիթքոֆի և ԱՄՆ նախագահի փեսա Ջարեդ Քուշների հետ՝ քննարկելով խաղաղության ծրագիրը։

Մակրոնի հետ համատեղ ասուլիսում Զելենսկին նշել է, որ ծրագրի վերջնական տարբերակը դեռ համաձայնեցվում է: