Բուենոս Այրեսում դադարեցվել է Մարադոնայի դամբարանի կառուցման նախագիծը

Արգենտինացի ֆուտբոլիստ Դիեգո Մարադոնայի դամբարանը կառուցելու նախագիծը Բուենոս Այրեսի կենտրոնում կասեցվել է։ «Դիեգո Արմանդո Մարադոնայի պատվին դամբարան կառուցելու պայմանագիրը դադարեցվել է»,- La Nación թերթին հայտնել է Corporación de Planeamiento Metropolitano շինարարական ընկերությունը։

Ընկերությունը հայտարարել է, որ պայմանագիրը դադարեցնելու որոշումը կայացվել է «այն ընդհանուր ըմբռնման հիման վրա, որ նախատեսված վայրը չունի այս մասշտաբի և բնույթի նախագիծ իրականացնելու համար անհրաժեշտ պայմանները՝ անհրաժեշտ երաշխիքներով»։

Չնայած դրան նախագծի կայքը շարունակում է գործել։ Այն դեռևս հնարավորություն է տալիս դամբարանի կառուցման համար նվիրաբերություն անել։

2024 թվականի հոկտեմբերին դատարանը Մարադոնայի դուստրերին թույլատրել էր ֆուտբոլիստի մարմինը տեղափոխել դամբարան, որի շինարարությունը նախատեսված էր ավարտել այս տարի: Մարադոնայի մարմինն այժմ հանգչում է Բուենոս Այրեսի արվարձաններից մեկի մասնավոր գերեզմանատանը, որը փակ է հանրության համար: