Մադագասկարի պալատի գաղտնի սենյակում հայտնաբերվել է 300 կիլոգրամանոց զմրուխտի հանքաքար

Մադագասկարի նոր իշխանությունները մայրաքաղաք Անտանանարիվուի նախագահական պալատում հայտնաբերել են 300 կիլոգրամանոց թանկարժեք քար, հաղորդում է Madagascar Tribune-ը։
Ըստ հանքարդյունաբերության նախարար Կարլ Անդրիամպարանիի՝ քարը զմրուխտ պարունակող ապարե մեծաբեկոր է։ Այս հանքային գանձը պահվում էր պալատի գաղտնի սենյակում 2009 թվականից ի վեր, և որևէ գործողություն չէր ձեռնարկվել այն գնահատելու կամ մշակելու համար, նշում է թերթը։ Մադագասկարի նոր ղեկավար գնդապետ Միքայել Ռանդրիանիրինան անձամբ այցելել է պալատ՝ հայտնաբերումը ստուգելու համար։ Նա հայտարարել է, որ պետությունը քննարկում է քարը վաճառելու հարցը՝ գանձարանը համալրելու և սոցիալական նախաձեռնություններին աջակցելու համար։ Ենթադրվում է, որ «հավաքորդական քար» դասակարգված զմրուխտը կարող է գրավել միջազգային ներդրողներին։
Իշխանությունները նախատեսում են անցկացնել տեխնիկական վերլուծություն՝ քարի գեմոլոգիական որակը, մաքրությունը և կտրման ներուժը գնահատելու համար։ Ֆինանսական գնահատում կկատարվի նաև միջազգային շուկայում դրա իրական արժեքը որոշելու համար։ Սեպտեմբերի վերջին ջրի և էլեկտրաէներգիայի անջատումների պատճառով սկսված զանգվածային բողոքի ցույցերի ֆոնին, որոնք հանգեցրին տասնյակ մարդկանց մահվան, Մադագասկարի նախագահ Անդրի Ռաջոելինան փախել է երկրից։ Հոկտեմբերի 14-ին գնդապետ Միքայել Ռանդրիանինան հռչակվել է պետության ղեկավար։