«Միջնաժամկետ հեռանկարում մենք YouTube-ը կփոխարինենք ամբողջությամբ». Անտոն Գորելկին

Ռուսական ծառայությունները միջնաժամկետ հեռանկարում ամբողջությամբ կփոխարինեն YouTube-ին։

Այս մասին հայտարարել է Պետդումայի տեղեկատվական քաղաքականության կոմիտեի առաջին փոխնախագահ Անտոն Գորելկինը:

Նա նշել է, որ երբ YouTube-ը մտավ ռուսական շուկա, այն գերիշխող մենաշնորհ հաստատեց տեսանյութերի հոսթինգի շուկայում։

«Այսօր մենք փորձում ենք շտկել այս իրավիճակը. մենք մշակում ենք մեր սեփական այլընտրանքները և վստահ ենք, որ միջնաժամկետ հեռանկարում մենք YouTube-ը կփոխարինենք ամբողջությամբ: Այն, ցավոք, դարձել է քարոզչության զենք»,- ասել է պատգամավորն ամերիկացի լրագրող և ԿՀՎ-ի և Պետդեպարտամենտի նախկին աշխատակից Լարի Ջոնսոնի հետ հարցազրույցում։

Նրա խոսքով՝ արևմտյան երկրները ակտիվորեն օգտագործում են այս ծառայությունը իրենց տեղեկատվական պատերազմում։

2024 թվականի ամռանը Ռուսաստանը սկսեց YouTube-ի աշխատանքի դանդաղեցման համակարգված քաղաքականություն, որը մինչև աշուն ստիպեց օգտատերերի մեծ մասին դիմել այլ ծառայությունների՝ բովանդակությունը դիտելու համար։ Հարկ է նշել, որ սահմանափակումները մտցվեցին անհավասարաչափ, և որոշ ինտերնետ մատակարարներ շարունակեցին ապահովել համեմատաբար կայուն հասանելիություն։