Իսրայելցի վերաբնակները հարձակվել են Բեթղեհեմում գտնվող պաղեստինյան գյուղի վրա

Իսրայելցի վերաբնակները հարձակվել են Բեթղեհեմի հարավ-արևմուտքում գտնվող ալ-Ջաբա գյուղի վրա: Պաղեստինյան աղբյուրների համաձայն, նրանք հրկիզել են մեկ տուն և երկու մեքենա, որից հետո բախումների ժամանակ վիրավորվել են մի քանի տեղացի բնակիչներ, այդ թվում՝ կանայք և տարեցներ:

Իսրայելի արտաքին գործերի նախարար Գիդեոն Սաարը դատապարտել է հարձակումը՝ նշելով, որ վերաբնակների գործողությունները չեն արտացոլում պետության դիրքորոշումը:

Վարչապետ Բենիամին Նեթանյահուն նույնպես խստորեն դատապարտել է միջադեպը՝ նշելով, որ «փոքր ծայրահեղական խմբի բռնի գործողությունները չեն ներկայացնում Հրեաստանի և Սամարիայի ժողովրդին»: Նա կոչ է արել իրավապահ մարմիններին՝ ձեռնարկել բոլոր օրինական միջոցները և հայտարարել, որ անձամբ կանդրադառնա այս հարցին՝ պլանավորելով հրավիրել համապատասխան նախարարներին՝ հետագա քայլերը մշակելու համար:

Իսրայելի պաշտպանության նախարարը ևս վերահաստատել է նման գործողությունների անընդունելիությունը և հայտարարել է անվտանգության ուժերին լրացուցիչ լիազորություններ և բյուջե տրամադրելու մասին՝ ծայրահեղական խմբավորումների դեմ համակարգված պայքարելու համար: