«Վազգեն Սաղաթելյանն ու Նարեկ Սամսոնյանը քաղաքական հալածյալներ են». Հակոբ Կարապետյան

Լրագրող Հակոբ Կարապետյանի ֆեյսբուքյան գրառումը․ «Նարեկ Սամսոնյանն ու Վազգեն Սաղաթելյանը, մեղմ ասած, չեն տեղավորվում հանրային գործչի իմ պատկերացումների մեջ, ու ես երբեք չեմ կարող նրանց համարել իմ համախոհը։ Հանրային դաշտում շարունակաբար ատելության խոսք ու հայհոյանք տարածելը, բամբասանքներն ու անձնական թիրախավորումները ոչ մի կերպ խրախուսելի չեն կարող լինել։ Ես, օրինակ, դադարեցրել եմ էս հարթակում իմ շփումները Սամսոնյանի հետ տարիներ առաջ, այն բանից հետո, երբ նա բավական կոպիտ կերպով վիրավորել էր ՔՊ-ական (այն ժամանակ՝ իմքայլական) կին պատգամավորներից մեկին՝ թիրախավորելով նրա անձնական հատկանիշները։ Մեկ ուրիշ նմանատիպ առիթով անֆրենդ եմ արել Վազգեն Սաղաթելյանին, որի հետ մինչ էդ նորմալ-հարգալից հեռահար կապ կար։
Ու այնուամենայնիվ, Վազգեն Սաղաթելյանն ու Նարեկ Սամսոնյանը քաղաքական հալածյալներ են։ Դեռ մի կողմ թողնենք, որ նրանք կարող են հիմնավորապես կարծել, թե համարժեք պատասխան են տվել ԱԺ խոսնակի գռեհիկ հրապարակային արտահայտություններին (ինչո՞վ է սեռական բնույթի հայհոյանքը ավելի վիրավորական, քան «շան տղան»), կամ կարող են ասել, թե իրենց բառապաշարն ընտրելիս ոգեշնչվել են երկրի վարչապետի կամ նույն ԱԺ խոսնակի օրինակով (ի վերջո, միայն հայհոյել են ու չեն թքել ընդդիմախոսի վրա)։
Հիմնական ցուցիչը, որով Սամսոնյանն ու Սաղաթելյանը դառնում են քաղբանտարկյալներ, այն է, որ օրենքը համանման չի մեկնաբանվում ու համանման չի կիրառվում։ Տեսեք՝ մի դեպքում մենք ունենք իշխանական պատգամավոր, որն ուղիղ եթերում զրուցակցին ասում է «ականջներդ կկտրեմ» ու դա արդարացվում է իբրեւ քաղաքական խոսք (ինչ էլ որ դա նշանակի), մի կողմից՝ երկրի վարչապետի կինն իր ընդդիմախոսներին ծաղրող գրառումներ է անում՝ շեշտելով նրանց ծագումը, սեռը, ինքնությունը, մի կողմից՝ վարչապետի աշխատակազմի բարձրաստիճան պաշտոնյայի հետ ակնհայտ կապ ունեցող կայքերում բամբասանք, հայհոյանք ու զրպարտություն է արտադրվում ամեն օր, մյուս կողմից էլ ընդդիմադիր գործիչները հայհոյանքի համար ձերբակալվում են ԱԱԾ կազմակերպած «մասկի շոուի» ուղեկցությամբ։ Հենց սա է քաղաքական հալածանքն ու հենց սա է ազատ արտահայտման իրավունքի ոտնահարումը՝ ինչքան էլ մենք համաձայն չլինենք հալածվողի հայացքների ու արտահայտչամիջոցների հետ։
Հ․ Գ․ Ի դեպ, այսօր լրանում է երկու ամիսն, ինչ իմ վրա դիմակավորված հարձակում տեղի ունեցավ Երեւանի կենտրոնում, ու մինչ օրս իրավապահները չեն հայտնաբերել հարձակվողին ու չեն բացահայտել հանցանքը։ Իրավապահ համակարգը, այսպիսով անկարող է, կամ չի ուզում, կամ հրահանգ ունի չբացահայտել պրիմիտիվ հանցագործությունը։ Ու քանի որ ես ինքնադատաստանին կտրականապես դեմ եմ, ապա մնում է միայն ջերմ ողջույններս փոխանցել էս իրավիճակը ստեղծողներին, խրախուսողներին ու պաշտպանողներին։ Տիգրան Ավինյան, կարող եք էդ ողջույններից ձեր «գողական» աշխատակցին էլ բաժին հանել։ Բառ առ բառ»։