ԱՄՆ-ն և Իսրայելը Գազայում ՀԱՄԱՍ-ի գրոհայինների վերաբերյալ համաձայնության են եկել

Իսրայելը և Միացյալ Նահանգները համաձայնության են եկել, որը թույլ կտա հեռանալ Գազայի հատվածի թունելներում փակված՝ ՀԱՄԱՍ-ի մոտ 200 զինյալների, որոնք գտնվում են Իսրայելի պաշտպանության ուժերի կողմից վերահսկվող տարածքներում, հաղորդում է The Jerusalem Post-ը՝ հղում անելով աղբյուրներին։

Աղբյուրը պարզաբանել է, որ տարածաշրջանի ոչ մի երկիր դեռևս պատրաստակամություն չի հայտնել ընդունել այդ պաղեստինցիներին։

Համաձայնությունը ձեռք է բերվել ԱՄՆ-ի նախագահի դեսպանորդ և փեսա Ջարեդ Քուշների և Իսրայելի վարչապետ Բենիամին Նեթանյահուի միջև Երուսաղեմում կայացած բանակցությունների ընթացքում։

Կողմերը քննարկել են նաև Գազայի հատվածի հնարավոր ապառազմականացումը, ՀԱՄԱՍ-ի զինաթափումը և շարժման ազդեցության լիակատար վերացումը տարածքում։

Ավելի վաղ Financial Times-ը հայտնել էր, որ Միացյալ Նահանգները և մի շարք այլ երկրներ ճնշում են գործադրում Իսրայելի վրա, որպեսզի ՀԱՄԱՍ-ի զինյալներին թույլ տրվի լքել Իսրայելի պաշտպանության ուժերի կողմից վերահսկվող տարածքներում գտնվող թունելները։