Մեծ Բրիտանիան դադարեցրել է ԱՄՆ-ի հետ Կարիբյան ավազանի վերաբերյալ հետախուզական տվյալների փոխանակումը

Մեծ Բրիտանիան դադարեցրել է ԱՄՆ-ի հետ Կարիբյան ավազանում թմրանյութեր տեղափոխելու մեջ կասկածվող նավերի վերաբերյալ հետախուզական տվյալների փոխանակումը, հաղորդում է CNN-ը՝ հղում անելով իրավիճակին ծանոթ աղբյուրներին։

Աղբյուրները հայտնել են, որ Մեծ Բրիտանիան չի ցանկանում մասնակցել ռազմական հարվածներին և այդ հարձակումները համարում է անօրինական։ Դադարն սկսվել է ավելի քան մեկ ամիս առաջ։

Զեկույցում նշվում է, որ այս որոշումը նշանակալի խզում է մտերիմ դաշնակցի հետ և ընդգծում է Լատինական Ամերիկայում ԱՄՆ-ի ռազմական արշավի նկատմամբ աճող կասկածամտությունը։ Բրիտանացի պաշտոնյաները կարծում են, որ ԱՄՆ-ի հարվածները խախտում են միջազգային իրավունքը։ Նրանք համաձայն են ՄԱԿ-ի մարդու իրավունքների գերագույն հանձնակատար Վոլքեր Թուրքի հետ, ով հարձակումներն անվանել է «մահապատիժ առանց դատաստանի»։

Մինչ այդ, ըստ աղբյուրների, Մեծ Բրիտանիան տարիներ շարունակ օգնել է ԱՄՆ-ի ափային պահպանությանը թմրանյութեր տեղափոխելու մեջ կասկածվող նավերի որոնման գործում։ Ապրանքները բռնագրավվել են, իսկ անձնակազմը՝ ձերբակալվել և դատվել։ Մարդկանց վերաբերվել են՝ որպես հանցագործների, բայց նրանք իրավունքներ ունեին։

Հոկտեմբերի 3-ին ԱՄՆ-ի նախագահ Դոնալդ Թրամփը հայտարարեց, որ Վաշինգտոնը պաշտոնական «զինված հակամարտության» մեջ է մտնում թմրանյութերի կարտելների հետ։ «Նյու Յորք Թայմս»-ը գրել է, որ որոշումը ցույց է տալիս, որ Սպիտակ տունը պնդում է արտակարգ պատերազմական լիազորությունների իր իրավունքի վրա։ Միջազգային իրավունքի համաձայն՝ զինված հակամարտության ժամանակ երկիրը կարող է «օրինականորեն սպանել թշնամու մարտիկներին, նույնիսկ եթե նրանք սպառնալիք չեն ներկայացնում»։

Նոյեմբերի 1-ին «Վաշինգթոն Փոստ»-ը հաղորդել է, որ ԱՄՆ-ն մեծացնում է իր ռազմական ներկայությունը Վենեսուելայի ափերի մոտ՝ թմրանյութերի դեմ պայքարի գործողությունների շրջանակներում, և որ տեղակայված զորքերի թիվը կարող է աճել մինչև 16,000։