«Հայաստանյայց Առաքելական Սուրբ եկեղեցում չպետք է լինեն աղանդավորական հակումներով հոգևորականներ». Վահագն Ավագյան

Ազգային-Ժողովրդավարական Բևեռի խորհրդի խոսնակ Վահագն Ավագյանի ֆեյսբուքյան գրառումը. «Քանի որ Արման Բաբաջանյանն էլի լացակումած տեսանյութ է հրապարակել՝ հորդորելով եպիսկոպոսներին դավաճանել Առաքելական եկեղեցու սրբությունը և անցնել թուրք-ռուսական կոլաբորանտ Նիկոլ Փաշինյանի ենթակայության տակ, անդրադառնամ նրան հուսադրած Բալթյան երկրներում Առաքելական եկեղեցու ներկայացուցիչ ոմն Վազգեն արքեպիսկոպոսի հայտարարություններին, որը Ազատություն ռկ-ի հարցին ի պատասխան հայտարարել է, թե բռնազավթված Հովհաննավանքի աղանդավորական ծեսը պատարագ է։
Որպես հիմնավորում՝ սույն անձը բերել է Մաթևոսի ավետարանի 18-րդ գլխի 20-րդ մասը՝
20. Որովհետև որտեղ երկու կամ երեք հոգի իմ անունով հավաքված լինեն, ես այնտեղ՝ նրանց մեջ եմ։
Բոլորս էլ հիշում ենք այս մարդու զավեշտալի մեկնաբանությունները ցեղասպան կոլաբորանտի Բալթյան երկրներ այցելության ժամանակ, երբ նա քաջալերում էր Ռուսաստանի ինքնախոստովանված կոլաբորանտ Նիկոլ Փաշինյանին շարունակել Հայաստանը Ռուսաստանից դեպի Եվրոպա տանելու առաքելությունը։
Մենք, բնականաբար, կարող ենք ըմբռնումով մոտենալ Հայաստանից 1000կմ հեռավորության վրա ապրող հոգևորականի քաղաքական անհասության հանգամանքին, բայց երբեք ու երբեք չենք ընդունի, որ Հայաստանյայց Առաքելական Սուրբ եկեղեցում լինեն աղանդավորական հակումներով հոգևորականներ։
Ոչ մեկի համար գաղտնիք չէ, որ աղանդավորների հիմնական գործիքը հանդիսանում է սուրբգրային տեքստերի՝ կոնտեքստից դուրս ցիտումները և դրանցով իրենց աղանդավորական (տվյալ դեպքում քաղաքական-աղանդավորական) դիրքերը հիմնավորելը։
Ներկայացնում եմ Քրիստոսի խոսքի տվյալ մասը ավելի լայն կոնտեքստով՝
15. Եթե եղբայրդ քո դեմ մեղանչի, գնա հանդիմանի՛ր նրան, երբ դու և նա առանձին լինեք։ Եթե քեզ լսի, քո եղբորը շահած կլինես։

16. Բայց եթե քեզ չլսի, վերցրո՛ւ քեզ հետ մեկ կամ երկու հոգու ևս, որպեսզի երկու կամ երեք վկաների բերանով ամեն բան հաստատվի (Բ Օր. 19.15)։

17. Սակայն եթե նրանց էլ չլսի, եկեղեցո՛ւն ասա։ Եթե եկեղեցուն էլ չլսի, թող քեզ համար հեթանոսի ու մաքսավորի պես լինի։
18. Ճշմարիտ եմ ասում ձեզ. ինչ որ երկրի վրա կապեք, կապված կլինի երկնքում, և ինչ որ երկրի վրա արձակեք, արձակված կլինի նաև երկնքում։

19. Դարձյալ ասում եմ ձեզ. եթե ձեզանից երկու հոգի մեկ բանի համար երկրի վրա միաբանվեն, ինչ որ խնդրեն, կլինի նրանց իմ Հորից, որ երկնքում է։

20. Որովհետև որտեղ երկու կամ երեք հոգի իմ անունով հավաքված լինեն, ես այնտեղ՝ նրանց մեջ եմ»։
Քրիստոսը այստեղ բառացի խոսում է եկեղեցու դեմ դուրս եկած աղանդավորների մասին, իսկ ոմն Վազգեն արքեպիսկոպոս այդ նույն հատվածը կոնտեքստից կտրում է աղանդավորներին արդարացնելու համար։ Ասեք որ սա սատանայի ձեռքի գործ չէ։
Քրիստոսն ասում է՝ ես կլինեմ ձեզ հետ, երբ դուք կարգի հրավիրելու լինեք մեղանչած եղբորը, և ես ձեզ հետ կլինեմ, եթե նա չլսի ձեզ և դեմ գնա եկեղեցուն, որ դուք նրան վերաբերվեք՝ որպես անհավատների (դուրս շպրտեք եկեղեցուց)։
Հուսով եմ՝ Մայր Աթոռ Սուրբ Էջմիածինն այս օրերին ընթացող հոգևոր ժողովի ընթացքում կբարձրացնի նաև այս ոմն արքեպիսկոպոսի հարցը և եթե նա կարգի չգա, դուրս կդնի նրան՝ ուղարկելով իր աղանդավոր եղբայրների հետ սուրբգրային տեքստերն աղավաղելու և Սուրբ պատարագի փոխարեն թատրոն բեմադրելու»։