Գերմանիան կարգելի ՌԴ քաղաքացիների մուտքն առանց կենսաչափական անձնագրի

2026 թվականի հունվարի 1-ից սկսած՝ Ռուսաստանի քաղաքացիներին Գերմանիա մուտքի վիզա ստանալու համար անհրաժեշտ կլինի կենսաչափական անձնագիր, հայտնում է Ռուսաստանում Գերմանիայի դիվանագիտական ​​​​առաքելության կայքը։

Ոչ կենսաչափական ռուսական անձնագրերի օգտագործումը թույլատրվելու է միայն այն դեպքում, եթե դրանք պարունակում են վավեր գերմանական վիզա։ Ընդ որում, մինչև այս տարվա դեկտեմբերի 31-ն արտասահմանում Գերմանիայի առաքելությունները կշարունակեն վիզաներ տրամադրել ռուսական ոչ կենսաչափական անձնագրերի տերերին, և այդ վիզաները կարող են օգտագործվել Գերմանիա մուտք գործելու և մնալու համար առանց լրացուցիչ փաստաթղթերի, նշվում է հայտարարության մեջ։

2026 թվականի հունվարի 1-ից սկսած՝ Գերմանիայում նոր վիզաների կամ նախկինում տրված բնակության թույլտվությունների երկարաձգման դիմումները հնարավոր կլինեն միայն կենսաչափական ռուսական անձնագիր ներկայացնելու դեպքում։

Նմանատիպ որոշումներ նախկինում կայացրել են Դանիան, Չեխիան, Ֆրանսիան, Էստոնիան, Լատվիան, Լիտվան և Իսլանդիան, որը Շենգենյան գոտու մաս է կազմում։