«Երեխաները ամենախոցելին են մեր հասարակությունում». Զառա Հովհաննիսյան

Իրավապաշտպան, հրապարակախոս Զառա Հովհաննիսյանի ֆեյսբուքյան գրառումը. «Երեխաները ամենախոցելին են մեր հասարակությունում։ Նրանք կախված են մեզնից՝ մեր հոգատարությունից, մեր արդարությունից և մեր պատասխանատվությունից։ Յուրաքանչյուր երեխայի մահվան դեպքի գույժ հասարակությանը ցնցում, ալեկոծում է, հետո նորից մենք մոռանում ենք, անտեսում համակարգային բացթողումներն ու շարունակում ամենակարևոր մարդկանց՝ փոքրիկներին թողնել բախտի քմահաճույքին։
Այն, որ Հայաստանում երեխաների պաշտպանության համակարգը պատշաճ չի գործում, նորություն չէ, երեխաներին վերևաբերվում են որպես ընտանիքի կցորդ, այլ ոչ առանձին անհատ, որը ունի միջավայրային խնդիր՝ առողջ զարգացման համար։
Կա նաև խորը մշակութային խնդիր, կապված բռնությունը, մարմնական պատիժները որպես դաստիարակչական մեթող օգտագործելու պրակտիկաների հետ։ UNICEF-ի տվյալներով՝ Հայաստանում ծնողների շուրջ 47%-ը դեռևս արդարացնում է ֆիզիկական պատիժը որպես դաստիարակչական միջոց, սա մշակութային խորը արմատներ ունեցող երևույթ է, երեխաները անհատներ չեն մեր մտածողական համակարգում, նրանք մեր ենթականերն են, որոնք դաժան վերաբերմունքով, մարմնական պատիժներով պետք է հղկվեն, կոփվեն ու մտնեն կյանք։
Չէ, դա այդպես չէ, ու այնքան ժամանակ ենք ցնցվելու նմանատիպ դեպքերից, մինչև պատրաստ չլինենք այդ հրաշք ու անպաշտպան էակներին որպես անհատներ ընդունելու և նրանց համար առողջ ու ապահով միջավայր ստեղծելու»: