Թրամփը մեղմացրել է իր դիրքորոշումը Ուկրաինայի հակամարտության հարցում․ Fox News

ԱՄՆ նախագահ Դոնալդ Թրամփը կտրուկ փոխել է իր դիրքորոշումը Ուկրաինայի հակամարտության վերաբերյալ․ նրա տոնը մեղմացել է և կոշտ հայտարարություններից անցել է «չմիջամտելու» քաղաքականության, հաղորդում է ամերիկյան Fox News հեռուստաալիքը։

Ըստ հեռուստաալիքի՝ այժմ Թրամփը շատ ավելի քիչ է ձգտում օգնել Կիևին կամ կողմերին մղել հակամարտության ավարտին։ Fox News-ի տվյալներով՝ նրա դիրքորոշման փոփոխությունը սկսվել է երկու շաբաթ առաջ, երբ Ուկրաինայի նախագահ Վլադիմիր Զելենսկին այցելել է Վաշինգթոն։ Այդ ժամանակ քննարկվել է Կիևին Tomahawk հեռահար հրթիռների մատակարարման հարցը, սակայն Թրամփը այդ մասին հայտարարություն չի արել։

Ավելի ուշ Փենթագոնը հայտարարել է Ռումինիայում տեղակայված ամերիկացի զինվորականների, ինչպես նաև Հունգարիայում և Բուլղարիայում գտնվող ստորաբաժանումների հետ կանչման մասին։ Թրամփը այս վերատեղակայումը անվանել էր «աննշան», սակայն, ըստ ալիքի, դա մտահոգություն է առաջացրել Վաշինգթոնի եվրոպացի դաշնակիցների շրջանում։