«Հիմա էլ փորձում եք դրսից ինչ-որ մի բան մուրալ»․ Արթուր Խաչատրյան

«Մենք երբեք չենք խոսել ապաշրջափակման դեմ»,- այս մասին ԱԺ-ում հայտարարեց «Հայաստան» խմբակցության պատգամավոր Արթուր Խաչատրյանը՝ մանրամասնելով․ «Մեր պահանջը բոլոր ճանապարհների միաժամանակյա ապաշրջափակումն է։ Դա ներառում է ՀՀ-ՀՀ ճանապարհի ապաշրջափակումը՝ Նախիջևանի միջոցով, որն անհնար է, քանի դեռ Սադարակ-Երասխ երկաթուղին կամ անցումը կառուցված չէ։ Դա ներառում է Իջևան-Ղազախ ճանապարհի ապաշրջափակումը»,- ասաց Խաչատրյանը՝ խոսելով նաև Ակտաու-Բաքու, այնուհետև ադրբեջանական ու վրացական երկաթգծով Հայաստան եկող ղազախական ցորենի մասին․ «Ձեր հանճարեղ քաղաքականության հետևանքով Ադրբեջանի կողմից Արցախի բռնազավթման արդյունքում մեր ցորենի մատակարարման 20%-ը կորցրեցինք, հիմա էլ փորձում եք դրսից ինչ-որ մի բան մուրալ, ձեռք բերել։ ՀՀ վարելահողերը 50%-ի չափով չեն մշակվում, այդ ուղղությամբ ի՞նչ եք անում, թե ԱԽՔ քարտուղարի ասած՝ ցորեն չկա, բրինձ կուտենք»,- ասաց Խաչտարյանը՝ նշելով, որ ցորենի այս խմբաքանակի՝ ՀՀ բերելը չի կարելի ներկայացնել որպես ապաշրջափակման արդյունք։