Անհետացել է Պիկասոյի «Նատյուրմորտ կիթառով» կտավը

Իսպանիայի ազգային ոստիկանությունը հետաքննում է Պաբլո Պիկասոյի «Նատյուրմորտ կիթառով» կտավի անհետացումը, որը պետք է տեղափոխվեր Մադրիդից Գրանադա, գրում է Ideal-ը՝ հղում անելով իր աղբյուրներին։
Կտավը նախատեսվում էր ցուցադրել «Նատյուրմորտ. իներտի հավերժություն» խորագրով ցուցահանդեսում, որը կազմակերպվել էր «Կախա-Գրանադա» հիմնադրամի կողմից և բացվել էր անցյալ շաբաթ Գրանադայում։

Մշակութային կենտրոնում հայտնել են, որ երբ բացել են աշխատանքները ցուցադրության սրահներում տեղադրելու համար, պարզել են, որ դրանցից մեկը՝ հենց Պիկասոյի «Կիթառը», բացակայում է։ Ցուցահանդեսը բացվել է նախատեսված օրը՝ առանց «Նատյուրմորտ կիթառով» կտավի։

Իրավապահների կարծիքով՝ Պիկասոյի աշխատանքը, ամենայն հավանականությամբ, անհետացել է տեղափոխման ընթացքում։

Կտավը, որը Պիկասոն ստեղծել է 1921 թվականին, ապահովագրված էր մոտ €600 հազար արժողությամբ։