«Ռուբիոն ռուս պաշտոնյաների հետ կքննարկի Թրամփ-Պուտին հանդիպման մանրամասները»․ WP

ԱՄՆ պետքարտուղար Մարկո Ռուբիոն ռուս պաշտոնյաների հետ կքննարկի ԱՄՆ և Ռուսաստանի նախագահներ Դոնալդ Թրամփի և Վլադիմիր Պուտինի Բուդապեշտում հաջորդ շաբաթ կայանալիք հանդիպման օրակարգը, հաղորդում է The Washington Post (WP)-ի սյունակագիր Դեյվիդ Իգնատիուսը՝ հղում անելով իր սեփական աղբյուրներին։
Հոդվածի հեղինակը նշում է, որ Ռուբիոն կարող է Ռուսաստանին առաջարկել տարբեր տնտեսական խթաններ՝ որպես Ուկրաինայի հակամարտությունը լուծելու ապագա խաղաղության համաձայնագրի հետևանք։ Միևնույն ժամանակ, ամերիկյան կողմը պլանավորում է Կիևին ավելի մեծ հեռահարության զենք մատակարարելու և պատժամիջոցները խստացնելու սպառնալիքն օգտագործել որպես լծակ։
Ավելի վաղ հոկտեմբերի 16-ի երեկոյան Թրամփը հեռախոսազրույց է ունեցել Ռուսաստանի նախագահ Վլադիմիր Պուտինի հետ։ Հակամարտության համատեքստում կողմերը քննարկել են նաև Ուկրաինային հեռահար հրթիռների մատակարարման հարցը։
Հեռախոսազրույցից հետո Պուտինը և Թրամփը համաձայնել են հանդիպել Բուդապեշտում։