Իսրայելը չի բացի Ռաֆահ անցակետը. ՀԱՄԱՍ-ը խախտել է պարտավորվածությունը

Իսրայելի իշխանությունները հոկտեմբերի 15-ին չեն բացի Եգիպտոս-Գազա սահմանին գտնվող Ռաֆահ անցակետը և կսահմանափակեն պաղեստինյան անկլավին տրամադրվող մարդասիրական օգնությունը: Պատճառն այն է, որ ՀԱՄԱՍ-ը խախտել է զոհված պատանդների մարմինները վերադարձնելու իր պարտավորությունները, հաղորդում է Ynet-ը։
Հոկտեմբերի 13-ի երեկոյան 28 զոհված պատանդներից միայն չորսը վերադարձվեցին Իսրայելի տարածք Գազայի հատվածից։ Իսրայելի պաշտպանության նախարար Իսրայել Կացը սա անմիջապես անվանեց շեղում Գազայի հատվածում հրադադարի համաձայնագրից և զգուշացրեց, որ Համասի կողմից զոհված պատանդների մարմինների վերադարձման հետագա ձգձգումները հետևանքներ կունենան։

Ըստ Ynet-ի, իսրայելցի պաշտոնյաները խորհրդակցել են Միացյալ Նահանգների, Կատարի, Եգիպտոսի և Թուրքիայի հետ այս հարցի շուրջ։ Կայքը հաղորդում է, որ Շարմ էլ Շեյխում բանակցությունների ժամանակ ՀԱՄԱՍ-ի ներկայացուցիչները պնդել են, որ գիտեն զոհված պատանդների կեսի մնացորդների գտնվելու վայրը։ Հետևաբար, Իսրայելը հույս ուներ վերադարձնել մինչև 15 զոհված առևանգվածների մարմիններ Գազայի հատվածում հրադադարի ուժի մեջ մտնելուց հետո։

Կարմիր խաչի միջազգային կոմիտեի (ԿԽՄԿ) խոսնակ Քրիստիան Կարդոնը հոկտեմբերի 14-ին հայտարարել է, որ զոհված իսրայելցի պատանդների մնացորդների վերադարձը լի է դժվարություններով և ժամանակ կպահանջի: Ըստ Al Jazeera-ի՝ զոհվածների մարմինների վերադարձը «ավելի դժվար է, քան կենդանի մնացածների ազատ արձակումը»: ՀԱՄԱՍ-ի խոսնակ Հազեմ Քասեմը Al Hadath-ին ասել է, որ շարժումը «միջնորդներին տեղեկացրել է պատանդների մարմինների հանձնման դժվարությունների մասին»: Նա նաև վստահեցրել է, որ ՀԱՄԱՍ-ը հավատարիմ է «համաձայնագրի բոլոր մանրամասներին»:

Կաթարի «Ալ Արաբի» հեռուստաալիքը հայտնել է, որ եգիպտական ​​​​խմբերը գործում են Գազայի հատվածում՝ օգնելով զոհված պատանդների մարմինների որոնմանը և կազմակերպելով նրանց տեղափոխումը Իսրայել: