«Հացահատիկի արտերը նվազել են»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը․ «Տավուշի մարզպետարանից տեղեկացել եմ, որ 2024 թվականին մարզում կատարվել է 1466,2 հա աշնանացան, որից ցորեն-980,4 հա, գարի - 480,1 հա։ 2010 թվականի սոցիալ-տնտեսական իրավիճակի մասին Տավուշի մարզպետի հաշվետվության մեջ նշված է, որ 2009 թվականին Տավուշի մարզում կատարվել է 5534 հա աշնանացան, այսիքն՝ վերջին 15 տարիներին Տավուշի մարզում աշնանացանի հեկտարներն ավելի քան 3 անգամ նվազել են։ Բացի այդ, խիստ ցածր է աշնանացան ցորենի և գարու բերքատվությունը։ Աշնանանցանի բերքատվության ցուցանիշների վերաբերյալ տեղեկատվական հարցում եմ արել Տավուշի մարզպետ Հայկ Ղալումյանին։ Մարզպետի աշխատակազմից հայտնել են․ «Համաձայն համայնքապետարանների կողմից ներկայացված օպերատիվ տեղեկատվությունների, մարզում 2024թ․ կատարված աշնանացանի՝ ցորենի միջին բերքատվությունը կազմել է 20,0 ց/հա, գարու միջին բերքատվությունը՝ 20,8 ց/հա»։