Չեխիան իր բյուջեից միջոցներ չի հատկացնի Ուկրաինային, բայց կօգնի ԵՄ-ի միջոցով

Չեխիայի Հանրապետությունն իր բյուջեից ոչ մի կրոն չի հատկացնի Ուկրաինային, փոխարենը այն կաջակցի Կիևին Եվրոմիության (ԵՄ) միջոցով։

Այս մասին հայտարարել է չեխական ընտրություններում հաղթած և վարչապետի թեկնածու ANO («Դժգոհ քաղաքացիների գործողություն») ընդդիմադիր շարժման առաջնորդ Անդրեյ Բաբիշը։
Քաղաքական գործիչը շեշտել է, որ Պրահան պատրաստ է Եվրոպային հատկացնել 60 միլիարդ կրոն (2,8 միլիարդ դոլար), որը հետո պետք է փոխանցվի Կիևին։ «Մենք գումար չունենք Չեխիայի Հանրապետության համար։ Մենք ուղղակիորեն օգնեցինք Ուկրաինային, իսկ հիմա կօգնենք նրան ԵՄ-ի միջոցով», - հայտարարել է նա։

Անդրեյ Բաբիշը նաև հայտարարել է Ուկրաինայի համար զինամթերքի գնման ծրագրի պայմանների վերանայման անհրաժեշտության մասին, որը նախկինում նախաձեռնել էր չեխական կողմը։ Նրա խոսքով՝ ANO-ն կառաջարկի ծրագրի վերանայում և առաջարկություններ կանի՝ ավելի մեծ թափանցիկություն ապահովելու համար։ Պարոն Բաբիշը խոստովանել է, որ ծրագիրը կարող է փոխանցվել ՆԱՏՕ-ին։

«Խոսքը զինամթերքի գնման ծրագիրը դադարեցնելու մասին չէ, այլ մանրակրկիտ վերանայման մասին է։ Անհրաժեշտ է թափանցիկություն»,- ավելի ուշ ANO-ի դիրքորոշումը բացատրել է պատգամավոր Լյուբոմիր Մետնարը:

Հոկտեմբերի 4-ին Չեխիայի խորհրդարանական ընտրություններում հաղթեց նախկին վարչապետ Անդրեյ Բաբիշի գլխավորած ANO ընդդիմադիր շարժումը։ Նախկին վարչապետի կուսակցությունը հավաքեց ձայների գրեթե 35%-ը և ապահովեց խորհրդարանի ստորին պալատի 200 տեղերից առնվազն 80-ը։