ԱՄՆ-ն և նրա միջազգային կոալիցիոն դաշնակիցները կրճատում են ռազմական առաքելությունն Իրաքում

Փենթագոնի մամուլի քարտուղար Շոն Փարնելը հայտարարել է, որ Միացյալ Նահանգները և նրա միջազգային կոալիցիոն դաշնակիցներն սկսում են կրճատել իրենց ռազմական առաքելությունն Իրաքում։ «Այս կրճատումն արտացոլում է մեր համատեղ հաջողությունը ԴԱԻՇ-ի դեմ պայքարում և նշանավորում է ԱՄՆ-Իրաք ամուր անվտանգության գործընկերության անցնելու ջանքերը՝ համապատասխան ԱՄՆ-ի ազգային շահերին, Իրաքի Սահմանադրությանը և ԱՄՆ-Իրաք ռազմավարական շրջանակային համաձայնագրին»,- ասել է Փարնելը։

Նա նշել է, որ գործընկերությունը կնպաստի ինչպես Միացյալ Նահանգների, այնպես էլ Իրաքի անվտանգությանը, ինչպես նաև կամրապնդի Բաղդադի տնտեսական զարգացման, ներդրումների և տարածաշրջանային առաջնորդության ներուժը։

Փենթագոնի բարձրաստիճան պաշտոնյայի խոսքով, որը նախընտրել է անանուն մնալ, Իրաքում կմնա 2000-ից պակաս ամերիկացի զինվոր, որոնց մեծ մասը կտեղակայվի Էրբիլում և Բաղդադում։

Իրաքի անվտանգության անանուն աղբյուրը AP-ին հայտնել է, որ ամերիկյան զորքերի դուրսբերումը Բաղդադից և երկրի արևմուտքում գտնվող Այն ալ-Ասադ ավիաբազայից սկսվել է մի քանի շաբաթ առաջ։