Apple Pay-ը վերջնականապես դադարեցրել է աշխատանքը Ռուսաստանում

Ռուսաստանի օգտատերերը խնդիրներ են ունեցել Apple Pay-ին օտարերկրյա քարտեր ավելացնելիս։ Ծառայությունը կարգավորելու փորձի ժամանակ հայտնվում է սխալի մասին հաղորդագրություն, որում նշվում է. «Apple Pay-ի կարգավորումը ձախողվել է»։ Որոշ դեպքերում հայտնվում է հաղորդագրություն, որ Apple Cash-ը անհասանելի է տարածաշրջանում, չնայած ավելացվում է սովորական բանկային քարտ։

«Արտասահմանյան քարտեր այլևս հնարավոր չէ ավելացնել Apple Pay-ին Ռուսաստանից»,- գրում են «Դուրովի կոդ» լրատվականի խմբագիրները։

Խմբագրական թիմը փորձարկել է iPhone-ի տարբեր մոդելներ և iOS տարբերակներ, ինչպես նաև Ղազախստանի, Բելառուսի և Հայաստանի բանկերի քարտեր, բայց՝ ապարդյուն։

Խնդրի լուծումներից մեկը VPN-ի օգտագործումն է, բայց ոչ բոլոր ծառայությունները կարող են շրջանցել այս սահմանափակումը։ Այս դժվարությունների պատճառները մնում են անհասկանալի։ Կարևոր է նշել, որ ռուսական քարտերը դեռևս հնարավոր չէ ավելացնել Apple Pay-ին։

Apple Pay-ը չի աշխատում Ռուսաստանում 2022 թվականից, հիմնականում Visa-ի և Mastercard-ի երկրից դուրս գալու պատճառով։