Ֆրանսիայում բողոքի ակցիաներ են՝ ընդդեմ կառավարության բյուջետային քաղաքականության

Ֆրանսիայում հարյուր հազարավոր մարդիկ տասնյակ քաղաքներում դուրս են եկել բողոքի՝ երկրի կառավարության բյուջետային քաղաքականության դեմ։ Այս մասին գրում է Le Parisien-ը։

Ընդհանուր առմամբ, երկրի տարածքում անցկացվում է ավելի քան 250 բողոքի ակցիա, որոնց մասնակցում է ավելի քան մեկ միլիոն մարդ։ Իսկ Ֆրանսիայի ՆԳՆ-ի տվյալներով՝ ցուցարարների թիվը կազմում է շուրջ 500 հազար, որոնցից 55 հազարը՝ միայն Փարիզում։

Ըստ վերջին տվյալների՝ ոստիկանությունը ձերբակալել է 181 անձի, այդ թվում՝ 31-ին Փարիզում։ Վիրավորվել է առնվազն տասը ցուցարար, 1 լրագրող և 11 անվտանգության ծառայող։ ՆԳՆ-ի տեղեկացմամբ՝ բողոքի ակցիաների հետևանքով մեկ օրվա ընթացքում արձանագրվել է 29 փողոցային հրդեհ և ճանապարհային երթևեկության 700 խախտում։

Ցուցարարները պահանջում են չեղարկել նախորդ կառավարության բյուջետային ծրագրերը, ավելացնել պետական ծառայությունների ծախսերը և բարձրացնել հարկերը հարուստների համար։

Ամենախոշոր բողոքի ակցիաներն այսօր ընթանում են Փարիզում, Թուլուզում, Նանտում և Մարսելում։ Մամուլի տվյալներով՝ քաղաքացիները վանկարկում են հակակառավարական կարգախոսներ և փակում ճանապարհները։ Փարիզում ցուցարարները ոստիկանների ուղղությամբ քարեր ու շշեր են նետել, իսկ վերջիններս պատասխանել են արցունքաբեր գազի կիրառմամբ։