ԱՄՆ-ն նոր պատժամիջոցներ է սահմանել Իրանի նկատմամբ

ԱՄՆ-ն պատժամիջոցներ է կիրառել 4 անհատների և 12 ընկերությունների նկատմամբ: Բոլոր անձինք Իրանի քաղաքացիներ են, որոնցից երկուսը կապված են Իրանի Իսլամական հեղափոխության պահապանների կորպուսի (ԻՀՊԿ) հետ, հաղորդում է ԱՄՆ-ի ֆինանսների նախարարության կայքը։

«Իրանական կազմակերպություններն ապավինում են ստվերային բանկային ցանցերին՝ պատժամիջոցները շրջանցելու և միջազգային ֆինանսական համակարգով միլիոնավոր դոլարներ տեղափոխելու համար»,- ասել է ԱՄՆ-ի ֆինանսների նախարարության ահաբեկչության և ֆինանսական հետախուզության հարցերով փոխնախարար Ջոն Հերլին։

Նրա խոսքով՝ Վաշինգթոնը «կշարունակի արգելափակել հիմնական ֆինանսական հոսքերը, որոնք աջակցում են Իրանի զենքի ծրագրերին և Մերձավոր Արևելքում գործունեությանը»։

Գերատեսչության տվյալներով՝ պատժամիջոցների ցուցակներում ընդգրկված Արաշ Էստակի Ալիվանդը և Ալիռեզա Դերախշանը կապված էին ԻՀՊԿ-ի հետ և աշխատում էին Իրանի պաշտպանության նախարարությունում: Երկու այլ քաղաքացիներ կասկածվում են ԱՄԷ-ում գործող պատժամիջոցների տակ գտնվող Alpa Trading - FZCO ընկերության հետ կապեր ունենալու մեջ: