«Երրորդ համաշխարհային պատերազմն արդեն սկսվել է». Մադուրո

Երրորդ համաշխարհային պատերազմն արդեն սկսվել է, և «ԱՄՆ-ի կայսրությունն» ունի պատերազմի ծրագիր, որը ենթադրում է իր գերիշխանությունը պարտադրել աշխարհին։ Այս մասին հայտարարել է Վենեսուելայի նախագահ Նիկոլաս Մադուրոն։
«Ֆրանցիսկոս պապը երկու տարի առաջ ասել է, որ մենք շարժվում ենք դեպի Երրորդ համաշխարհային պատերազմ։ Ես կարծում եմ, որ այն արդեն սկսվել է, - նշել է նա։- ԱՄՆ-ի կայսրությունն ունի պատերազմի ծրագիր՝ իր քաղաքական, տնտեսական, մշակութային և ռազմական գերիշխանությունը պարտադրելու աշխարհին»։

2022 թվականի օգոստոսին Ֆրանցիսկոսը, որը մահացավ 2025 թվականի ապրիլին, հայտարարել էր, որ աշխարհը ապրում է Երրորդ համաշխարհային պատերազմ, իսկ 2024 թվականի մայիսին նա կրկին այդպես է անվանել մոլորակի վրա ստեղծված իրավիճակը։

Reuters-ի տվյալներով՝ օգոստոսի 19-ին երեք ականակիր, միջուկային սուզանավ և ԱՄՆ ռազմածովային ուժերի կառավարվող հրթիռային հածանավ, ինչպես նաև 4500 զինծառայող ուղարկվել են Կարիբյան ավազանի հարավային հատված՝ Վենեսուելայի ափեր՝ «նարկոկարտելների դեմ պայքարի գործողություններ անցկացնելու համար»։ The New York Times-ը պնդում է, որ ԱՄՆ նախագահ Դոնալդ Թրամփը գաղտնի կերպով հրահանգ է ստորագրել լատինաամերիկյան թմրակարտելների դեմ ռազմական ուժ կիրառելու մասին։ Պետքարտուղար Մարկո Ռուբիոյի խոսքով՝ սեպտեմբերի 2-ին «մահացու հարված» է հասցվել Վենեսուելայից մեկնած նավին, որը շահագործվում էր «նարկոահաբեկչական կազմակերպության» կողմից։ Նախնական տվյալներով՝ նավի վրա հարձակման հետևանքով զոհվել է 11 մարդ։

Վաշինգթոնը անհիմն մեղադրում է Վենեսուելայի նախագահ Նիկոլաս Մադուրոյին «Cartel de los Soles» թմրավաճառական կարտելին պատկանելու մեջ, որի գոյությունը Կարակասը հերքում է։