Գերմանիան 10 միլիարդ եվրո կծախսի քաղպաշտպանության և ապաստարանների համար

Գերմանիայի իշխանությունները պատրաստվում են Սառը պատերազմից ի վեր քաղաքացիական պաշտպանության համակարգի ամենամեծ արդիականացմանը։

Բնական աղետների, ռազմական հակամարտությունների և այլ ճգնաժամային իրավիճակների ժամանակ բնակչությանը պաշտպանելու համար մինչև 2029 թվականը կհատկացվի 10 միլիարդ եվրո, Bild-ին տված հարցազրույցում ասել է Ներքին գործերի նախարար Ալեքսանդր Դոբրինդտը։ Նրա խոսքով՝ միջոցները կօգտագործվեն ռմբապաստարանների և պաշտպանիչ կառույցների ցանցի վերականգնման համար։ Նախկինում շատ ապաստարաններ փակվել էին ավելորդ լինելու պատճառով, ուստի այժմ Գերմանիայում դրանցից միայն 579-ն է մնացել։ Դրանք տեղավորում են 500 հազարից պակաս մարդու՝ 80 միլիոնից ավելի բնակչության պարագայում։

Դոբրինդտը պարզաբանել է, որ ծրագիրը նախատեսում է նաև ժամանակակից նախազգուշացման համակարգերի ներդրում՝ սկսած ազդանշաներից մինչև թվային ծանուցումներ և բջջային հեռախոսներով ծանուցումներ, և 1500 միավոր սարքավորումների ձեռքբերում հրշեջների, բժիշկների, փրկարարների և շարժական հրամանատարական կետերի համար։ Բացի այդ, միջոցները կօգտագործվեն քաղաքացիական պաշտպանության կազմակերպությունների, Տեխնիկական օգնության դաշնային գործակալության (THW) և Բունդեսվերի մասնակցությամբ զորավարժություններ անցկացնելու համար։ Իշխանությունները նաև մտադիր են ընդլայնելու անվտանգ կապի համակարգը՝ աղետների և հակամարտությունների դեպքում բոլոր արտակարգ ծառայությունների միջև անխափան փոխազդեցությունն ապահովելու համար։

Հունիսին Գերմանիայի քաղաքացիական պաշտպանության և աղետների հետևանքների վերացման դաշնային գործակալության ղեկավար Ռալֆ Թիսլերը հայտարարել էր, որ երկիրը չորս տարվա ընթացքում կընդլայնի ռմբապաստարանների և ապաստարանների ցանցը՝ հնարավոր ռուսական հարձակմանը նախապատրաստվելու համար։

Ավելի վաղ պաշտպանության նախարար Բորիս Պիստորիուսը խոսել էր մինչև 2029 թվականը Գերմանիան պատերազմին պատրաստելու անհրաժեշտության մասին։