«Նվազագույնը յոթ երկիր այժմ պատրաստ է հյուրընկալել Ուկրաինայի և Ռուսաստանի առաջնորդների հանդիպումը». Անդրեյ Սիբիգա

Ուկրաինայի արտաքին գործերի նախարար Անդրեյ Սիբիգան նշել է այն երկրների ցանկը, որտեղ Վլադիմիր Զելենսկին պատրաստ է հանդիպել Ռուսաստանի նախագահ Վլադիմիր Պուտինի հետ: Նրա խոսքով՝ դրանք են Ավստրիան, Վատիկանը, Թուրքիան, Շվեյցարիան և Պարսից ծոցի երեք երկրներ:

Չորեքշաբթի օրը ավելի վաղ Պուտինը հայտարարել էր, որ եթե Զելենսկին պատրաստ է հանդիպմանը, ապա պետք է գա Մոսկվա:

«Նվազագույնը յոթ երկիր այժմ պատրաստ է հյուրընկալել Ուկրաինայի և Ռուսաստանի առաջնորդների հանդիպումը... Դրանք են Ավստրիան, Սուրբ Աթոռը (Վատիկան - խմբ.), Շվեյցարիան, Թուրքիան և Պարսից ծոցի երեք երկրներ: Սրանք լուրջ առաջարկներ են, և նախագահ Զելենսկին պատրաստ է նման հանդիպման»,- գրել է Սիբիգան իր X սոցիալական ցանցի էջում:

ԱՄՆ-ի նախագահ Դոնալդ Թրամփը նախկինում հայտարարել էր Պուտինի և Զելենսկու հանդիպման նախապատրաստման մասին, որից հետո կարող է տեղի ունենալ նրա մասնակցությամբ եռակողմ հանդիպում: Ռուսաստանի առաջնորդի միջազգային հարցերով օգնական Յուրի Ուշակովը նշել է, որ հեռախոսազրույցի ընթացքում Պուտինը և Թրամփը աջակցություն են հայտնել Ռուսաստանի և Ուկրաինայի պատվիրակությունների միջև ուղիղ բանակցությունների շարունակմանը: Այս առումով, մասնավորապես, քննարկվել է այն միտքը, որ անհրաժեշտ կլինի ուսումնասիրել ուկրաինական և ռուսական կողմերի ներկայացուցիչների մակարդակը բարձրացնելու հնարավորությունը։