Ֆինլանդիայում բացվել է ՆԱՏՕ-ի նոր շտաբ-բնակարան` Սանկտ Պերբուրգից 300 կմ հեռավորության վրա

Սեպտեմբերի 1-ին Ֆինլանդիայի Միկկելի քաղաքում պաշտոնապես սկսեց գործել ՆԱՏՕ-ի ցամաքային ուժերի տարածաշրջանային հրամանատարության շտաբ-բնակարանը։ Այս մասին հայտնել են Ֆինլանդիայի ցամաքային ուժերը իրենց պաշտոնական կայքում։ Քաղաքը գտնվում է Ռուսաստանի սահմանից ընդամենը 140 կիլոմետր և Սանկտ Պետերբուրգից 304 կիլոմետր հեռավորության վրա։ Նախկինում դաշինքի հրամանատարության՝ Ռուսաստանին ամենամոտ շտաբ-բնակարանը գտնվում էր Լեհաստանի Շեցին քաղաքում՝ դա «Հյուսիսարևելյան» բազմազգ կորպուսն է, որը գտնվում է Կալինինգրադից 414 կմ հեռավորության վրա։

Առաջին փուլում Միկկելիում կաշխատի մոտ տասը սպան, սակայն մի քանի տարիների ընթացքում անձնակազմի թիվը կաճի մինչև 50 մարդու։ Ղեկավարությունը կձևավորվի ՆԱՏՕ-ի անդամ երկրների, այդ թվում՝ Ֆինլանդիայի ներկայացուցիչներից։ Հաղորդագրության համաձայն, շտաբը պատասխանատու կլինի հյուսիսային տարածաշրջանում դաշինքի ցամաքային ուժերի կառավարման, ազգային բանակների գործողությունների համակարգման, ինչպես նաև զորավարժությունների և գործողությունների համատեղ պլանավորման համար։ Նոր կառույցը կենթարկվի ԱՄՆ-ում ՆԱՏՕ-ի Նորֆոլկի հրամանատարությանը, որը պատասխանատու է Ատլանտյան օվկիանոսի և Արկտիկայի համար։