«Բուֆերային գոտի արդեն իսկ գոյություն ունի». Զելենսկի

Ուկրաինայի նախագահ Վլադիմիր Զելենսկին մեկնաբանել է Politico-ի հոդվածը, ըստ որի՝ եվրոպացի առաջնորդները քննարկում են ուկրաինական և ռուսական զորքերի միջև բուֆերային գոտի ստեղծելու հնարավորությունը՝ որպես խաղաղության համաձայնագրի մաս։

«Մեկ անգամ չէ, որ եվրոպացիներից և ամերիկացիներից լսել եմ այդ մասին։ Միայն նրանք, ովքեր այսօր չեն հասկանում տեխնոլոգիական ինչ պայմաններում է ընթանում պատերազմը, առաջարկում են 40-50-60, նույնիսկ լսել եմ 100 կմ բուֆերային գոտու առաջարկի մասին։ Իրավիճակը բոլորովին այլ է։ Այսօր մեր ծանր սպառազինությունն արդեն գտնվում է 10+ կմ հեռավորության վրա, քանի որ ամեն ինչ անօդաչու թռչող սարքերի հարվածի տակ է։ Այս բուֆերային գոտին, որը ես անվանում եմ մեռյալ գոտի, ոմանք անվանում են գորշ գոտի, արդեն իսկ գոյություն ունի»,- ասել է Զելենսկին։

Նրա խոսքով՝ եթե Ռուսաստանը ցանկանում է, որ ուկրաինական բանակը լինի ավելի մեծ հեռավորության վրա, ռուս զինվորները կարող են հետ գնալ՝ դեպի ժամանակավորապես օկուպացված տարածքների խորքերը։

Հիշեցնենք՝ Politico-ն գրել էր, որ եվրոպացի առաջնորդներն ու զինվորականները քննարկում են Ուկրաինայի և Ռուսաստանի դիրքերի միջև մինչև 40 կմ բուֆերային գոտու ստեղծման հարցը: