Բանտարկյալների ազատման դիմաց Լուկաշենկոն Թրամփից խնդրել է մեղմացնել պատժամիջոցները

Բելառուսը բանակցություններ է վարում ամերիկացի դիվանագետների հետ Մինսկի կողմից «մեծ թվով» բանտարկյալների ազատ արձակման վերաբերյալ: Դրա դիմաց Բելառուսի նախագահ Ալեքսանդր Լուկաշենկոն խնդրել է իր ամերիկացի գործընկեր Դոնալդ Թրամփին մեղմացնել պատժամիջոցները։

Այս մասին հաղորդում է լեհական Rzeczpospolita-ն՝ հղում անելով աղբյուրներին։
Մինսկը հույս ունի վերացնել «Բելավիա» ավիաընկերության և կալիումական պարարտանյութեր արտադրող Belaruskali ընկերության նկատմամբ պատժամիջոցները: Թերթի աղբյուրի խոսքով՝ Լուկաշենկոն ձգտում է «դուրս գալ մեկուսացումից» և բարելավել հարաբերություններն ԱՄՆ-ի նախագահի հետ։

Օգոստոսի 15-ին Ալեքսանդր Լուկաշենկոն և Դոնալդ Թրամփը հեռախոսազրույց են ունեցել: Կողմերը քննարկել են 1300 բանտարկյալների ազատ արձակման հարցը։

Հունիսին Բելառուսի իշխանությունները ներում են շնորհել 14 մարդու: Նրանց թվում է ընդդիմադիր քաղաքական գործիչ Սերգեյ Տիխանովսկին, որը ձերբակալվել էր 2020 թվականին զանգվածային անկարգություններ կազմակերպելու համար: Որոշումը կայացվել է ԱՄՆ-ի նախագահի՝ Ուկրաինայի հարցերով հատուկ ներկայացուցիչ Քիթ Քելլոգի՝ Մինսկ այցից հետո։