«Ոչ ոք չի կարող դիմադրել Զանգեզուրի միջանցքին»․ Լուկաշենկո

Բելառուսի նախագահ Ալեքսանդր Լուկաշենկոն անդրադարձել է ԱՄՆ-ի նախագահ Դոնալդ Թրամփի հետ Վաշինգթոնում Ադրբեջանի և Հայաստանի միջև համաձայնագրի ստորագրման վերաբերյալ իր հեռախոսազրույցին։

«Ես շնորհավորել եմ նրան (Թրամփին)… Հայաստան և Ադրբեջան․ դա արդեն մեծ պլյուս է։ Ասացի՝ ապրեք, որ հնարավորություններ եք գտել, բոլորին նստեցրել եք բանակցությունների սեղանի շուրջ և կարողացել եք համաձայնության գալ հայերի և ադրբեջանցիների հետ՝ նման համաձայնագիր ստորագրելու հարցում։ Գիտեմ, որ այս Զանգեզուրի միջանցքը չափազանց անհրաժեշտ էր Ադրբեջանի հետ կապն ապահովելու համար։ Նրանք (ամերիկացիները) իրենց դիրքորոշումն արտահայտեցին և ասացին՝ մենք կլինենք այս ամենի սեփականատերերը և կվերահսկենք։ Սա հիանալի բան է»,- ասել է Լուկաշենկոն՝
նշելով, որ նախագիծն «իրանցիներին դուր չի գալիս»։

«Բայց ոչ ոք չի կարող դիմադրել դրան։ Սրանք խաղաղության համաձայնագրեր են, որոնք կօգնեն միջանցք կառուցել Հայաստանի տարածքով։ Հիմա երկու շրջանները՝ Ադրբեջանը և նրա էքսկլավը, կապված կլինեն ոչ միայն օդային ճանապարհով։ Նա վաստակել է դա»,- ասել է Բելառուսի նախագահը։