«Իսրայելական զորքը կմնա Հոլանի բարձունքներում»․ Կաց

Իսրայելական զորքերը կմնան Սիրիայի հարավում գտնվող Հոլանի բարձունքների բուֆերային գոտում՝ հրեական պետության հյուսիսային սահմանի անվտանգությունն ապահովելու, ինչպես նաև դրուզ բնակչությանը պաշտպանելու համար, հայտարարել է Իսրայելի պաշտպանության նախարար Իսրայել Կացը։

«Իսրայելի պաշտպանության բանակը կմնա Հերմոն լեռան գագաթին և այն անվտանգության գոտում, որն անհրաժեշտ է Հոլանի բարձունքների և Գալիլեայի բնակավայրերը սիրիական կողմից եկող սպառնալիքներից պաշտպանելու համար, ինչը հոկտեմբերի 7-ի իրադարձությունների գլխավոր դասն է։ Մենք նաև կշարունակենք պաշտպանել դրուզներին Սիրիայում», - գրել է քաղաքական գործիչը իր X սոցիալական ցանցի իր էջում։
Անցյալ շաբաթ Իսրայելի ԱԳՆ ղեկավար Գիդեոն Սաարը հայտարարել էր, որ Թել Ավիվը հետաքրքրված է Սիրիայի և Լիբանանի հետ հարաբերությունների կարգավորմամբ՝ միաժամանակ ապահովելով ազգային անվտանգության շահերը, ընդգծելով, որ Հոլանի բարձունքները կմնան Իսրայելի ինքնիշխանության ներքո՝ ցանկացած համաձայնագրի դեպքում։