«Ալյասկայում Պուտինը Թրամփին վերադարձրեց իր ազդեցության տակ». Բոլթոն

ԱՄՆ-ի ազգային անվտանգության նախկին խորհրդական Ջոն Բոլթոնը Espresso-ին տված հարցազրույցում ասել է, որ Դոնալդ Թրամփի և Վլադիմիր Պուտինի՝ Ալյասկայում կայացած հանդիպումից հետո տեղի ունեցած իրադարձությունները գերագնահատվում են։
«Ալյասկայում Պուտինին հաջողվեց Թրամփին վերադարձնել իր ազդեցության տակ։ Այս ազդեցությունը, այն երևակայական բարեկամությունը, որը Թրամփը սիրում է ընդգծել, թուլացավ Թրամփի վեցամսյա անհաջող փորձերի պատճառով՝ հրադադարի հասնելու համար։ Ալյասկայում Պուտինը, իր տեսանկյունից, կարողացավ վերականգնել իրավիճակը իր օգտին», - նշել է Բոլթոնը։

Ըստ նրա, Վաշինգթոնում եվրոպացի առաջնորդների և Ուկրաինայի նախագահ Վլադիմիր Զելենսկու հետ Թրամփի հետագա հանդիպումները հնարավորություն տվեցին չեզոքացնելու այս ազդեցությունը։ Միևնույն ժամանակ, Ռուսաստանը դեռևս չի ցուցաբերել խաղաղության բանակցություններում իրական զիջումների գնալու պատրաստակամություն։

Բոլթոնը նաև մեկնաբանել է Ֆրանսիայի նախագահ Էմանուել Մակրոնի հոռետեսությունը, որը սոցցանցերում նշել է Պուտինի՝ խաղաղության նկատմամբ հետաքրքրության պակասը։ Նախկին խորհրդականը սա անվանել է բանակցային գործընթացից սպասելիքները նվազեցնելու փորձ։

Նա չբացառեց Պուտինի, Թրամփի և այլ առաջնորդների հետ երկկողմ և եռակողմ հանդիպումներ անցկացնելու հնարավորությունը, սակայն նշեց, որ դրանք, հավանաբար, դրամատիկ չեն լինի. «Պուտինը, ամենայն հավանականությամբ, երկար դասախոսություն կկարդա պատմության իր տեսլականի մասին, իսկ Զելենսկին կներկայացնի Ուկրաինայի դիրքորոշումը։ Զրույցը կտևի ժամերով, և մենք չպետք է ակնկալենք զիջումներ երկու կողմերից էլ»։

Նման հանդիպումների նախապատրաստումը, ըստ նրա, կտևի շաբաթներ, և էական փոփոխություններ չպետք է ակնկալել։ Բոլթոնը ընդգծեց, որ Պուտինը ձգտում է այս կերպ բանակցություններ վարել՝ հույսը դնելով Ուկրաինայի վստահության աստիճանական նվազման վրա պատերազմը շարունակելու ունակության նկատմամբ։

Բացի այդ, Բոլթոնը նշեց, որ Վաշինգթոնում կայացած հանդիպմանը տարածքների փոխանակման հարցը չի քննարկվել։ Դրա փոխարեն առաջնորդները կենտրոնացել են Ուկրաինային անվտանգության երաշխիքներ տրամադրելու վրա, ինչը, նրա կարծիքով, արտացոլում է տարածքային հարցի բարդությունը։