«Կարող ենք առաջարկել սահմանազատման հարցում տեխնիկական օգնություն»․ Ադրբեջանում Միացյալ թագավորության դեսպան

Մեծ Բրիտանիան ողջունում է Ադրբեջանի և Հայաստանի միջև բանակցություններում գրանցված նշանակալի առաջընթացը և սա համարում է տարածաշրջանում կայուն խաղաղության պատմական հնարավորություն։ Ադրբեջանական ԶԼՄ-ների հետ զրույցում նշել է Ադրբեջանում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ֆերգուս Օլդը։

«Մենք պատրաստ ենք աջակցել երկու երկրներին ցանկացած համաձայնագրի իրականացման գործում, մասնավորապես այն ոլորտներում, որտեղ Մեծ Բրիտանիան ապացուցված փորձ ունի։ Ադրբեջանի և Հայաստանի միջև խաղաղության հասնելը շրջադարձային կետ կլինի Հարավային Կովկասի տարածաշրջանի համար։ Մեծ Բրիտանիան միշտ հավատացել է, որ կայուն խաղաղությունը հնարավոր է միայն երկխոսության, փոխադարձ հարգանքի և հարևանների միջև գործնական համագործակցության միջոցով։ Մենք կարող ենք առաջարկել ապացուցված լուծումներ՝ սահմանազատման հարցում տեխնիկական օգնություն, համաշխարհային մակարդակի ականազերծման հնարավորություններ, որոնք կպահպանեն համայնքների անվտանգությունը և կդարձնեն հողը բերրի, և տնտեսական կապի նախագծերի աջակցություն», – նշել է դիվանագետը։