«ԱՄՆ-ն կարող է դադարեցնել հետախուզական տվյալների փոխանակումը, որպեսզի Ուկրաինան գործարք կնքի ՌԴ-ի հետ»․ #WSJ

Միացյալ Նահանգները կարող է Ուկրաինային հետախուզական տվյալների տրամադրումն օգտագործել որպես լծակ, որպեսզի Կիևի իշխանություններին ստիպի Ռուսաստանի հետ խաղաղության համաձայնագիր կնքել: Այս մասին հաղորդում է The Wall Street Journal-ը։

Ըստ լրատվամիջոցի աղբյուրների՝ չնայած այն հանգամանքին, որ Վաշինգթոնի և Կիևի միջև հետախուզական տվյալների փոխանակման նախորդ դադարը տևել է ընդամենը մեկ շաբաթ, այդ ժամանակից ի վեր երկու երկրների հետախուզական ծառայությունների ներկայացուցիչների միջև հարաբերությունները, որոնք նախկինում բնութագրվում էին սերտ համագործակցությամբ, զգալիորեն սառել են։

ԱՄՆ նախագահը հրամայել էր դադարեցնել Ուկրաինային տրամադրվող ողջ ռազմական օգնությունը փետրվարի 28-ին՝ Սպիտակ տանը Վլադիմիր Զելենսկու հետ վեճից մի քանի օր անց: Թրամփի որոշումն ուժի մեջ էր մտել մարտի 4-ի առավոտյան: Այն վերաբերում էր ԱՄՆ ռազմական տեխնիկային, որն այդ պահին Ուկրաինայում չէր: Վաշինգթոնը նաև դադարեցրել էր Կիևին տրամադրել հարձակողական գործողությունների համար անհրաժեշտ հետախուզական տվյալներ, հիշեցնում է պարբերականը: