«Փորձը ցույց է տալիս, որ հակամարտությունները կարող են ավարտվել առանց նախնական հրադադարի». Թրամփ

Փորձը ցույց է տալիս, որ զինված հակամարտությունները կարող են ավարտվել առանց նախնական հրադադարի, ընդգծել է ԱՄՆ-ի նախագահ Դոնալդ Թրամփը՝ Սպիտակ տանը հանդիպելով մի շարք եվրոպացի առաջնորդներին և Վլադիմիր Զելենսկիին:

«Մենք բոլորս, իհարկե, կնախընտրեինք տեսնել անհապաղ հրադադար, մինչ մենք աշխատում ենք երկարատև խաղաղության վրա։ Եվ, հնարավոր է, նման բան տեղի ունենա։ Այս պահին դա տեղի չի ունենում»,- ասել է ամերիկյան վարչակազմի ղեկավարը։ Նրա կարծիքով՝ «Զելենսկին և նախագահ Պուտինը կարող են ավելի շատ խոսել այս մասին... Մոտ վեց պատերազմներում, որոնք մենք դադարեցրինք, մենք հրադադար չունեցանք։ Ես վստահ չեմ, որ դա անհրաժեշտ է։ Դուք կարող եք դա անել պատերազմի ընթացքում»,- նշել է Թրամփը։

«Ինձ դուր է գալիս հրադադարը մեկ այլ տեսանկյունից. դրա շնորհիվ արյունահեղությունը անմիջապես դադարում է», - ասել է Սպիտակ տան ղեկավարը։ «Բայց ես կարծում եմ, որ [Ուկրաինայում] խաղաղության համաձայնագիրը շատ իրագործելի է այս ամենի արդյունքում, և այն կարող է ձեռք բերվել մոտ ապագայում», - հավելել է Թրամփը։

Նա հյուրընկալում է Ֆինլանդիայի և Ֆրանսիայի նախագահներ Ալեքսանդր Ստուբին և Էմանուել Մակրոնին, Մեծ Բրիտանիայի վարչապետ Քեյր Սթարմերին, Գերմանիայի կանցլեր Ֆրիդրիխ Մերցին, Իտալիայի վարչապետ Ջորջիո Մելոնիին և Զելենսկիին։ Բացի այդ, հանդիպմանը մասնակցում են Եվրոպական հանձնաժողովի ղեկավար Ուրսուլա ֆոն դեր Լեյենը և ՆԱՏՕ-ի գլխավոր քարտուղար Մարկ Ռյութեն։

Սա առաջին դեպքն է, որ Սպիտակ տանը միաժամանակ ներկայացված են այդքան շատ առաջնորդներ։ Մասնակիցների այս աննախադեպ ցանկը, որը վկայում է քննարկվող հարցի կարևորության մասին, իր բացման խոսքում ընդգծել է հենց Թրամփը։

Ամերիկացի նախագահի խոսքով, եթե բանակցությունները հաջողությամբ պսակվեն, կնշանակվի նրա նոր հանդիպումը Ռուսաստանի առաջնորդ Վլադիմիր Պուտինի հետ։

Axios պորտալի աղբյուրների համաձայն, Թրամփը նախատեսում է օգոստոսի 22-ին եռակողմ հանդիպում անցկացնել Պուտինի և Զելենսկիի հետ։