Իսրայելի արտգործնախարարը խորհուրդ է տվել փակել Ֆրանսիայի հյուպատոսությունը Երուսաղեմում

Իսրայելի արտաքին գործերի նախարար Գիդեոն Սաարը խորհուրդ է տվել վարչապետ Բենիամին Նեթանյահուին փակել Երուսաղեմում գտնվող Ֆրանսիայի հյուպատոսությունը՝ ի պատասխան Փարիզի կողմից Պաղեստինի պետությունը միակողմանիորեն ճանաչելու քայլի։ Հարցը բարձրացվել է այսօր կառավարության նիստում, հաղորդում է «Իսրայել Հայոմ»-ը։

Սփյուռքի հարցերով նախարար Ամիխայ Շիկլին կառավարությանը հայտնել է, որ Ֆրանսիայի նախագահ Էմանուել Մակրոնի քայլը «լուրջ հարված է հասցրել պատանդներին և Իսրայել պետությանը, և մեր կողմից այս հարցի վերաբերյալ ոչ մի հայտարարություն բավարար չէ»։ Շիկլին կոչ է արել «Երուսաղեմում ֆրանսիական ակտիվների ազգայնացման», այդ թվում՝ հյուպատոսության փակման։

Արտգործնախարար Գիդեոն Սաարը հաստատել է, որ այս քայլը դիտարկում է՝ որպես հնարավոր պատասխան և ասել է, որ արդեն առաջարկություններ է ներկայացրել Նեթանյահուին այս հարցի վերաբերյալ։ Շուտով սպասվում է, որ այս հարցի վերաբերյալ որոշում կկայացվի։