«Նախ՝ հրադադար, ապա՝ խաղաղության համաձայնագրի վրա աշխատանք». Զելենսկի

Նախ անհրաժեշտ է դադարեցնել կրակը, ապա խաղաղության համաձայնագրի վրա աշխատել։ Այս մասին հայտարարել է Ուկրաինայի նախագահ Վլադիմիր Զելենսկին Եվրոհանձնաժողովի ղեկավար Ուրսուլա ֆոն դեր Լեյենի հետ համատեղ մամուլի ասուլիսում, հաղորդում է «Ուկրաինսկա պրավդան»։

«Պուտինը շատ պահանջներ ունի, և մենք դրանք բոլորը չգիտենք։ Եթե դրանք իսկապես այնքան շատ են, որքան լսել ենք, ապա դրանք բոլորը քննարկելու համար երկար ժամանակ կպահանջվի, և դա չի կարող արվել զենքի ճնշման տակ։ Հետևաբար, անհրաժեշտ է դադարեցնել կրակը, արագ աշխատել վերջնական համաձայնագրի վրա։ Մենք այս մասին կխոսենք Վաշինգտոնում [Թրամփի հետ հանդիպման ժամանակ]», - ասել է Զելենսկին։

Ուկրաինայի նախագահը նաև հայտարարել է, որ տարածքային հարցը պետք է քննարկեն միայն Ռուսաստանի և Ուկրաինայի առաջնորդները՝ ԱՄՆ-ի մասնակցությամբ եռակողմ հանդիպման ժամանակ։

Զելենսկին ընդգծել է, որ Ռուսաստանը «դեռևս հաջողություններ չունի Դոնեցկի շրջանում, Պուտինը չի կարողացել այն գրավել 12 տարի շարունակ»։ Նա հավելեց, որ Ուկրաինայի Սահմանադրությունը «անհնար է դարձնում տարածքների հանձնումը կամ հողերի առևտուրը»։