«Քաղաքական նկատառումներով մարդկանց կալանավորումը երկրի համար վտանգավոր ճգնաժամի ազդանշան է»․ Սուրեն Սուրենյանց

«Դեմոկրատական այլընտրանք» կուսակցության նախագահ, քաղաքագետ Սուրեն Սուրենյանցի ֆեյսբուքյան գրառումը․

«Փաշինյանի չօգտագործված շանսը․
Նիկոլ Փաշինյանն անցած երկու օրերին հնարավորություն ուներ ազատ արձակելու Սամվել Կարապետյանին և Միքայել Սրբազանին։
Սակայն նա ընտրեց ոչ թե հանդարտեցնելու և լարվածությունը մեղմելու, այլ անտագոնիզմի խորացման ճանապարհը։
Հայաստանում քաղաքական նկատառումներով մարդկանց կալանավորումը երկրի համար վտանգավոր ճգնաժամի ազդանշան է։
Այն խորացնում է իշխանություն–ընդդիմություն հակադրությունը՝ փակելով քաղաքական երկխոսության և փոխզիջման դռները։
Տանում է հասարակության խոր բևեռացման, երբ քաղաքացիները սկսում են ապրել ոչ թե ընդհանուր օրակարգով, այլ միմյանց հակառակ բարիկադներում։
Ստեղծում է վստահության խոր ճգնաժամ՝ հատկապես 2026-ի ընտրությունների հանդեպ, երբ հանրության մի մասի աչքում քաղաքական մրցակցությունը վերածվում է իշխանության կողմից վերահսկվող գործընթացի։
Այս ամենը կարող է հանգեցնել վտանգավոր զարգացումների՝ սոցիալական լարվածության, զանգվածային բողոքների և անկայունության։
Եթե Նիկոլ Փաշինյանը 2026-ի ընտրություններն անցկացնի ավտորիտարիզմի նշանաբանով, ապա նա փաստացի խրախուսելու է պայքարի ոչ սահմանադրական և ոչ քաղաքական վտանգավոր դրսևորումները՝ դնելով երկիրը անկանխատեսելի ճգնաժամերի առջև։
Ժողովրդավարությունը չի կարող ամրապնդվել երբ բանտերը լցվում են քաղաքական հայացքների համար կալանավորվածներով։
Ազատություն բոլոր քաղբանտարկյալներին»: