«ՀՀ-ի և Իրանի միջև գոյություն ունի փոխադարձ հստակեցված դիրքորոշում»․ Արման Բաբաջանյան

ԱԺ նախկին պատգամավոր Արման Բաբաջանյանի գրառումը. ««Հայկական կողմը հավաստիացրել է, որ պահպանվել են Իրանի բոլոր կարմիր գծերը»,- ասել է Ւրանի ԱԳ նախարար Արաղչին։ Հայաստանի համար այս փաստն առանձնահատուկ նշանակություն ունի, քանի որ 2020 թվականի պատերազմից ի վեր Իրանը հանդես է եկել զգուշավոր, բայց սկզբունքային քաղաքականությամբ։ Պատերազմի օրերին, չնայած Երևանը անգամ դիմեց զենքի մատակարարման խնդրանքով, Թեհրանը մերժեց, սակայն դա չնվազեցրեց նրա ռազմավարական դերը։
2021 թվականին, երբ Ադրբեջանը, Ռուսաստանը և Թուրքիան Սյունիքի ուղղությամբ սպառնալիքներ էին հղում, Իրանի կոշտ և հրապարակային դիրքորոշումը՝ Սյունիքի սահմանների անքակտելիության օգտին, կանխեց իրավիճակի սրումը։ 2022 թվականին, Գեղարքունիքի, Վայոց ձորի և Սյունիքի սահմանային հատվածներում Ադրբեջանի զինված հարձակումների պայմաններում, Իրանի դիրքորոշումը դարձյալ եղել է զսպող և կանխարգելիչ։
2024 թվականի ապրիլի 5-ին Բրյուսելում կայացած Հայաստան–ԵՄ–ԱՄՆ բարձր մակարդակի գագաթնաժողովի նախօրեին Ադրբեջանը, Թուրքիան և Ռուսաստանը փորձեցին համատեղ հայտարարությամբ հարվածել նախաձեռնությանը և Հայաստանի միջազգային աջակցությունը կտրուկ նվազեցնել, սակայն Իրանը հանդես եկավ չափավոր և հավասարակշռված առանձին հայտարարությամբ, որի արդյունքում մյուս երկրների հնարավոր միասնական ճնշումը չկայացավ։
Այս ամբողջ ժամանակահատվածում Իրանը փաստացի ապահովել է Հայաստանի համար անվտանգային ու քաղաքական կարևոր բուֆերային դեր։
Սա քաղաքական և դիվանագիտական հստակ հաղթանակ է, որն ապահովում է, որ Հայաստանի և Իրանի միջև սահմանի անվտանգության ու տարածաշրջանային հավասարակշռության հարցում գոյություն ունի փոխադարձ հստակեցված և հաստատված դիրքորոշում՝ Հայաստանի ինքնիշխանության լիարժեք պահպանմամբ»։