«Մենք վերջին քայլն ենք արել խաղաղություն հաստատելու ուղղությամբ». Ալիև

ԱՄՆ կատարած այցի ընթացքում Ադրբեջանի նախագահ Իլհամ Ալիևը հարցազրույց է տվել Fox News հեռուստաալիքին։ Հեռուստաալիքի կայքում հրապարակվել է Ալիևի որոշ հայտարարությունների հիման վրա պատրաստված հոդված։
Մասնավորապես, նա ասել է, որ «ցանկացած երկրի համար, թե՛ մեր տարածաշրջանում, թե՛ դրանից դուրս, շատ դժվար կլինի այսօրվա նվաճման մասին վատ բան ասել։ Որովհետև այսօր, ըստ էության, «մենք վերջին քայլն ենք արել խաղաղություն հաստատելու ուղղությամբ»։

Ադրբեջանի նախագահն ասել է, որ Զանգեզուրի միջանցքի (TRIPP) վերաբերյալ ձեռք բերված համաձայնագիրն ուղղված չէ որևէ մեկի դեմ. «Սա տրանսպորտային կապի նոր նախագիծ է, որը կդառնա միջազգային տրանսպորտային ուղիների կարևոր բաղադրիչներից մեկը»։

Հարցազրույցում նախագահ Իլհամ Ալիևը նաև շնորհակալություն է հայտնել ԱՄՆ նախագահ Դոնալդ Թրամփին և նրա թիմին համաձայնագրի կնքման գործում ունեցած դերի համար։

Ալիևը նաև խոսել է Ռուսաստանի հետ հարաբերությունների և 2024 թվականի դեկտեմբերին «Ադրբեջանական ավիաուղիներ» ավիաընկերության ինքնաթիռի խոցման մասին։ Իլհամ Ալիևը նշել է, որ Ադրբեջանը սա չի համարում դիտավորյալ հարձակում։ «Մեր միակ պահանջը այս փաստի ճանաչումն էր, հանցագործության մեղավորների պատժումը և փոխհատուցման լրիվ վճարումը», - ասել է Իլհամ Ալիևը։