«ՔՊ-ականների լղոզված թեզերի տարածման նպատակը հասարակության ուշադրությունը շեղելն է»․ Վիտալի Մանգասարյան

«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը. «Երբ ՔՊ-ականները իրար հերթ չտալով հայտարարում են, թե «միջանցքային լուծում» չի լինելու, տրամաբանական հարց է առաջանում, իսկ իրենք առհասարակ հստակեցրե՞լ են, թե ինչ են հասկանում «միջանցք» ասելով։ Ո՞ր պահից է ճանապարհը դառնում «միջանցք», իսկ ո՞ր դեպքում՝ «կապուղի» կամ «տրանսպորտային հաղորդակցություն»։
Ավելին, հենց Նիկոլ Փաշինյանն էր իր վերջին հարցազրույցում ասում, որ «պետք չէ վախենալ միջանցք բառից»՝ փաստացի հերթական անգամ հակադրվելով իր և սեփական թիմակիցների օր ու գիշեր կրկնող այն թեզին, թե «միջանցք չի լինելու»։ Այսինքն՝ ՔՊ-ականները նույնիսկ ներքին համաձայնության չեն հասել, թե ի վերջո պետք է վախենալ «միջանցք» բառից, թե ոչ։ Մեկն ասում է՝ դա սուտ է ու չի լինելու, մյուսը՝ որ պետք չէ վախենալ։ Այս հակասականությունը վկայում է ոչ թե բաց ու գիտակցված քաղաքականության, այլ հերթական լղոզված, մարդկանց մոլորեցնող, լավագույն դեպքում կիսաճշմարտացի թեզերի տարածման մասին, որոնց նպատակը հասարակության ուշադրությունը շեղելն է իսկական գործընթացներից»։