ԱՄՆ-ի ֆինանսների նախարարությունը հայտարարել է Իրանի նկատմամբ նոր պատժամիջոցների մասին

ԱՄՆ-ի ֆինանսների նախարարությունը հայտարարել է ֆինանսական տեխնոլոգիաների, կրիպտոարժույթների և օֆշորային գործողությունների հետ կապված իրանական 11 ընկերությունների և 7 անհատների նկատմամբ պատժամիջոցների կիրառման մասին, ասվում է գերատեսչության մամուլի հաղորդագրության մեջ։
Փաստաթղթում նշվում է, որ սահմանափակումները վերաբերում են իրանական Fanap տեխնոլոգիական հոլդինգի հետ կապված կառույցներին, այդ թվում՝ Cyrus Offshore Bank-ին, Pasargad Arian-ին, RUNC Exchange System-ին և մի շարք այլ կազմակերպությունների։

Իրանական ընկերություններն ու անհատները ներառված են ԱՄՆ ֆինանսների նախարարության պատժամիջոցների ցանկում։ Նրանք մեղադրվում են Թեհրանին պատժամիջոցները շրջանցելու հարցում օգնելու և միջազգային անվտանգությանն սպառնացող ծրագրերին աջակցելու մեջ։

Ներկայացված միջոցառումների շրջանակներում նրանց ակտիվներն ԱՄՆ-ի իրավասության տակ կարգելափակվեն, իսկ ամերիկացի քաղաքացիներին ու ընկերություններին կարգելվի համագործակցել նրանց հետ։

Հիշեցնենք, որ հուլիսի վերջին ԱՄՆ-ի իշխանությունները պատժամիջոցներ են կիրառել Իրանից 50 ֆիզիկական և իրավաբանական անձանց, ինչպես նաև այդ երկրի կողմից վերահսկվող ավելի քան 50 նավերի նկատմամբ, որոնք, ըստ Վաշինգթոնի, զբաղվում էին նավթի առևտրով։ Սա 2018 թվականից ի վեր ամենամեծ նմանատիպ պատժամիջոցների փաթեթն է։