Շքեղ զբոսանավեր արտադրող թուրք գործարարն անհետ կորել է իր զբոսանավով

Թուրքական Mazu Yachts ընկերության սեփականատեր Հալիթ Յուքայը իր Graywolf զբոսանավով դուրս է եկել Թուրքիայի հյուսիս-արևմուտքից՝ Յալովայից և ուղևորվել դեպի Հունաստան, սակայն անհետ կորել է:

Գործարարի հարազատները զանգահարել են արտակարգ ծառայություններ, երբ չեն կարողացել կապ հաստատել նրա հետ։
Ափային պահպանությունը որոնողական-փրկարարական գործողություններ է իրականացնում։ Կիսախորտակված զբոսանավի մնացորդները հայտնաբերվել են Մարմարա կղզու մոտ (Բալիկեշիր նահանգ), սակայն Յուքայը չի գտնվել։ Ջրասուզորդների խումբը, նավը զննելուց հետո, գործարարի որևէ հետք չի գտել։

Տեսախցիկի տեսագրությունում երևում է, թե ինչպես է Graywolf զբոսանավը դուրս գալիս Յալովայի նավահանգստից։

43-ամյա Հալիթ Յուքայը թուրքական Mazu Yachts ընկերության հիմնադիրն ու սեփականատերն է, որը զբաղվում է շքեղ զբոսանավերի արտադրությամբ։