Թրամփը ակնկալում է հաջորդ շաբաթ հանդիպել Պուտինի հետ. NYT

ԱՄՆ-ի նախագահ Դոնալդ Թրամփը նախատեսում է հաջորդ շաբաթ անձամբ հանդիպել Ռուսաստանի նախագահ Վլադիմիր Պուտինի հետ, իսկ դրանից անմիջապես հետո մտադիր է եռակողմ ձևաչափով հանդիպել Պուտինի և Ուկրաինայի նախագահ Վլադիմիր Զելենսկու հետ։ Այս մասին հայտնում է The New York Times-ը։

Ըստ աղբյուրների՝ Թրամփն իր ծրագրերը բացահայտել է եվրոպացի առաջնորդների հետ հեռախոսազրույցի ժամանակ, որոնք, սակայն, չեն մասնակցի հանդիպումներին։ Եվրոպացի առաջնորդները, որոնք փորձել են համակարգող դեր խաղալ Ռուսաստանի և Ուկրաինայի միջև պատերազմի դադարեցմանը նվիրված հանդիպումներում, կարծես թե համաձայն են Թրամփի հայտարարության հետ, հայտնել է աղբյուրներից մեկը։

Զելենսկուց բացի, այսօրվա հեռախոսազրույցին մասնակցել են նաև Մեծ Բրիտանիայի առաջնորդը, Գերմանիայի կանցլերը և ՆԱՏՕ-ի գլխավոր քարտուղարը, ինչպես նաև փոխնախագահ Ջեյմս Դեյվիդ Վենսը, պետքարտուղար Մարկո Ռուբիոն և Թրամփի հատուկ բանագնաց Սթիվ Ուիթքոֆը։