Արաբական երկրները պահանջում են, որ ՀԱՄԱՍ-ը լքի Գազան

Կատարը, Սաուդյան Արաբիան, Եգիպտոսը և մի շարք այլ արաբական պետություններ ստորագրել են հռչակագիր, որով կոչ են անում զինաթափել ՀԱՄԱՍ-ին և վերջ դնել նրա կառավարմանը Գազայում: Փաստաթուղթը համաձայնեցվել է ՄԱԿ-ի համաժողովում, որը նվիրված էր երկու պետությունների՝ Իսրայելի և Պաղեստինի ստեղծման գործընթացի վերսկսմանը:

Ընդհանուր առմամբ, հայտարարությունը ստորագրել են 17 երկրների ներկայացուցիչներ, այդ թվում՝ Ֆրանսիայի, Մեծ Բրիտանիայի, Կանադայի, ինչպես նաև Եվրոմիության և Արաբական լիգայի ներկայացուցիչները:

«Գազայում պատերազմի ավարտի համատեքստում ՀԱՄԱՍ-ը պետք է վերջ դնի իր կառավարմանը և իր զենքը հանձնի Պաղեստինի ինքնավարությանը՝ միջազգային աջակցությամբ: Սա համապատասխանում է ինքնիշխան և անկախ պաղեստինյան պետություն ստեղծելու նպատակին»,- ասվում է տեքստում:

Փաստաթղթում նաև դատապարտվում են ՀԱՄԱՍ-ի կողմից Իսրայելի վրա 2023 թվականի հոկտեմբերի 7-ին իրականացված հարձակումները, որոնք առաջացրել են ներկայիս հակամարտությունը:

Ֆրանսիայի արտաքին գործերի նախարար Ժան-Նոել Բարոն ընդունված հռչակագիրն անվանել է «պատմական և աննախադեպ»:

«Առաջին անգամ արաբական երկրները և Մերձավոր Արևելքի պետությունները դատապարտում են ՀԱՄԱՍ-ին, դատապարտում են հոկտեմբերի 7-ի իրադարձությունները, կոչ են անում նրան զինաթափել, հեռացնել պաղեստինյան կառավարումից և հստակորեն արտահայտում են իրենց մտադրությունը՝ ապագայում կարգավորել հարաբերությունները Իսրայելի հետ», - ասել է նա։

Փաստաթղթի դրույթները ներառում են նաև ռազմական գործողությունների դադարեցումից հետո Գազայում միջազգային կայունացման առաքելություն տեղակայելու հնարավորությունը։ Այս առաքելությունը պետք է ուղարկվի Պաղեստինի ինքնավարության հրավերով, ՄԱԿ-ի հովանու ներքո և ՄԱԿ-ի Անվտանգության խորհրդի մանդատով։

Իսրայելը և Միացյալ Նահանգները չեն մասնակցել համաժողովին։