Իրանում ջրի սուր պակաս է. դիտարկվում է Թեհրանը ժամանակավորապես փակելու հարցը. Bild

Իրանի իշխանությունները բախվում են աննախադեպ ջրային ճգնաժամի։ Թեհրանը և երկրի մեծ մասը քաղցրահամ ջրի սուր պակաս ունեն, գրում է Bild-ը։ Պաշտոնական տվյալների համաձայն՝ երկրի ջրամբարների մոտ 80%-ը գրեթե դատարկ է, իսկ խոշոր գետերն ու ջրամբարները չորացել են։

Իրանի կառավարությունը քննարկում է «անսովոր և ոչ ավանդական միջոցառումներ», այդ թվում՝ աշխատանքային շաբաթվա կրճատում, զանգվածային հեռավար աշխատանք և նույնիսկ մայրաքաղաք Թեհրանի ժամանակավոր փակում։ Սա կարող է նշանակել դպրոցների, համալսարանների և պետական ​​մարմինների աշխատանքի դադարեցում։

Կառավարության խոսնակ Ֆաթեմեհ Մոհաջերանին իրավիճակն անվանել է «ազգային խնդիր», որը կարող է վերաճել մարդասիրական և տնտեսական աղետի։ Նրա խոսքով՝ «Թեհրանում ջրային իրավիճակը կրիտիկական է, ուստի լրջորեն քննարկվում է քաղաքի ժամանակավորապես փակման հարցը»։

Մի շարք քաղաքներ, այդ թվում՝ Թեհրանը, արդեն իսկ սահմանափակել են ջրամատակարարումը։ Որոշ շրջաններում անջատումները տևում են մինչև 48 ժամ։ Ճգնաժամին ի պատասխան՝ որոշ բնակիչներ գաղթում են երկրի հյուսիս՝ Կասպից ծով, որտեղ դեռևս ջրային պաշարներ կան։

Իրանի նախագահ Մասուդ Փեզեշկիանը չի բացառել մայրաքաղաքը մեկ այլ շրջան տեղափոխելու հնարավորությունը։ «Թեհրանում իսկապես ջուր չկա»,- ասել է նա՝ ընդգծելով, որ երկիրը դժվար որոշումների առջև է կանգնած։

Մասնագետները նշում են, որ ճգնաժամի պատճառներից մեկը երկարատև երաշտն է և բնապահպանական ու ջրային ենթակառուցվածքներում համակարգված ներդրումների բացակայությունը։ Առաջիկա երկու ամիսների ընթացքում էական բարելավում չի սպասվում. ջրային ռեսուրսների համալրումը հնարավոր է միայն աշնանային անձրևների դեպքում։