Գերմանիան Հորդանանի օգնությամբ կազմակերպում է «օդային կամուրջ» Գազայի համար

Գերմանիայի կանցլեր Ֆրիդրիխ Մերցը հայտարարել է, որ Գերմանիան՝ Հորդանանի օգնությամբ, կազմակերպում է «օդային կամուրջ»՝ Գազայի հատվածի բնակիչներին մարդասիրական օգնություն հասցնելու համար։

«Գերմանիայի կառավարությունը՝ Հորդանանի հետ համագործակցությամբ, անհապաղ ստեղծում է «օդային կամուրջ» Գազայի վրայով՝ մարդասիրական օգնություն հասցնելու համար։ Պաշտպանության նախարար Բորիս Պիստորիուսը սերտորեն կհամակարգի իր գործողությունները Ֆրանսիայի և Մեծ Բրիտանիայի հետ, որոնք նույնպես պատրաստ են նման «օդային կամուրջ» ապահովել սննդի և դեղորայքի համար», - ասել է Մերցը Անվտանգության խորհրդի նիստից հետո, որը ոչ պաշտոնական մարմին է, և ներառում է Գերմանիայի հիմնական նախարարությունների և անվտանգության գործակալությունների ղեկավարներին։

Նրա խոսքով՝ Բեռլինը շահագրգռված է որքան հնարավոր է շուտ «Գազայի խաղաղ բնակչության տառապանքներին վերջ դնելով»:

Մերցը նաև ասել է, որ դաշնային կառավարությունը քննարկել է Պաղեստինի պետականության ճանաչման հնարավորությունը, բայց ներկայում չի պլանավորում որոշում կայացնել այդ հարցի վերաբերյալ։

Ավելի վաղ Իսրայելի վարչապետ Բենիամին Նեթանյահուն հայտարարել էր, որ Գազայում իբրև թե սով չկա, և Թել Ավիվը «նման քաղաքականություն չի վարում անկլավի բնակիչների նկատմամբ»։