«Հեղուկ գազի գինը շարունակում է բարձրանալ»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Հեղուկ գազի գինը շարունակում է բարձրանալ: Առայժմ միակ «բացատրությունը» մամուլում տեղ գտած այն հրապարակումներն էին, որ Վրաստանը խնդիրներ է ստեղծում Հայաստան գազ ներկրող բեռնատարների համար, ժամանակ են կորցնում, ստիպված են կաշառք տալ և հետևաբար գինը թանկանում է:

Մի քանի օր առաջ էկոնոմիկայի նախարարը մի գրառում էր արել, թե տնտեսական մրցակցության պաշտպանության հանձնաժողովը պետք է քննի հեղուկ գազի գնագոյացման հարցը:

Չգիտեմ, տնտեսական մրցակցության պաշտպանության հանձնաժողովը քննո՞ւմ է, թե՞ ոչ: Թեև, որ քննի՝ ի՞նչ: Հայաստանում տնտեսական մրցակցության պաշտպանության հանձնաժողովը ինչպես եղել է ըստ էության ձևական կառույց՝ գործադիրի կցորդ, այդպես էլ կա, ինչպես ի դեպ բոլոր այսպես կոչված «անկախ» ինստիտուտները: Ավելին, այդ ինստիտուտների գերակշռող մասի առումով անգամ ձևական անկախությունը չեն էլ փորձում ապահովել:

Բայց, տվյալ դեպքում էկոնոմիկայի նախարարի գրառումը ուշադրության էր արժանի այլ իմաստով: Նա կարծես թե ակնարկում էր, որ հեղուկ գազի շուկայում տեղի է ունենում մանիպուլյատիվ մի բան, իսկ Վրաստանում տարանցման խնդիրը մամուլում բարձրաձայնվում է կամ մանիպուլյացիան ծածկելու համար, կամ էլ Վրաստանում ինքնին տարբեր կապերով առաջացնում են արհեստական խնդիրներ՝ առիթ ստեղծելով գնային մանիպուլյացիաների համար»: