Ադրբեջանի և Թուրքիայի պաշտպանության նախարարները ռազմական հուշագիր են ստորագրել

Ադրբեջանի Հանրապետության պաշտպանության նախարար, գեներալ-գնդապետ Զաքիր Հասանովը, որը այցով գտնվում է Ստամբուլում և մասնակցելու IDEF 2025 17-րդ միջազգային պաշտպանական արդյունաբերության ցուցահանդեսին, հանդիպել է Թուրքիայի ազգային պաշտպանության նախարար Յաշար Գյուլերի հետ։

Այս մասին հայտնել է Պաշտպանության նախարարությունը։
Նշվում է, որ հանդիպմանը քննարկվել են «երկու եղբայրական երկրների միջև ռազմական, ռազմատեխնիկական և ռազմակրթական ոլորտներում համագործակցության ներկա վիճակը և զարգացման հեռանկարները»։ Ընդգծվել է նաև, որ ռազմավարական համագործակցության ամրապնդման տեսանկյունից IDEF 2025 ցուցահանդեսը հատուկ նշանակություն ունի։

Կողմերը նաև մանրամասն մտքեր են փոխանակել տարածաշրջանային անվտանգության հարցերի և փոխադարձ հետաքրքրություն ներկայացնող մի շարք այլ հարցերի շուրջ։

Հանդիպման ավարտին ստորագրվել է «Փոխադարձ ռազմական անվտանգության ամրապնդման մասին փոխըմբռնման հուշագիր»։